உத்தர பிரதேச மாநிலத்தின் ரேபரேலியில் சமீபத்தில் நடைபெற்ற பொதுக்கூட்டத்தில் பேசிய காங்கிரஸ் எம்.பி., மற்றும் லோக்சபா எதிர்க்கட்சி தலைவரான Rahul Gandhi, பிரதமர் Narendra Modi மற்றும் உள்துறை அமைச்சர் Amit Shah ஆகியோர் குறித்து கடுமையான விமர்சனங்களை முன்வைத்தார்.
அப்போது அவர், “பிரதமர் மோடி மற்றும் அமித் ஷா இருவரும் நாட்டை விற்ற துரோகிகள். அவர்கள் அரசியலமைப்பு சட்டத்தையும், தேசிய சின்னங்களையும் தாக்கியவர்கள்,” என குற்றம்சாட்டியிருந்தார்.
இதற்கு பா.ஜ., கடும் எதிர்ப்பு தெரிவித்துள்ளது. அக்கட்சியின் தேசிய தலைவர் Nitin Nabin தனது சமூக வலைதள பதிவில், “மோடி மற்றும் அமித் ஷாவுக்கு எதிராக ராகுல் தெரிவித்த கருத்துகள் துரதிருஷ்டவசமானவை. இது அவரது அராஜக மனப்பான்மையையும், குணநலன்களையும் வெளிப்படுத்துகிறது.
தேர்தல்களில் தொடர்ந்து தோல்விகளை சந்தித்து வரும் காங்கிரஸ் கட்சியின் விரக்தி மற்றும் ஏமாற்றமே இந்த கருத்துகளில் வெளிப்படுகிறது. ராகுல் தனது சமநிலையை இழந்து வருகிறார்,” என்று குறிப்பிட்டுள்ளார்.
மேலும், “ராகுலின் பேச்சு நாட்டின் 140 கோடி மக்களையும் அவமதிக்கும் வகையில் உள்ளது. இதற்காக அவர் மக்களிடம் மன்னிப்பு கேட்க வேண்டும்,” என்றும் தெரிவித்துள்ளார்.
இதேபோல், பா.ஜ., செய்தித் தொடர்பாளர் Pradeep Bhandari தனது சமூக வலைதள பதிவில், “பிரதமர் மோடியின் தலைமையில் இந்தியா ஒற்றுமையாக இருப்பதை கண்டு ராகுல் எரிச்சலும், கோபமும் அடைந்துள்ளார்.
அவரது பேச்சு, பாகிஸ்தான் பயங்கரவாதிகள் பயன்படுத்தும் மொழிநடையை ஒத்துள்ளது. இந்தியாவுக்கு எதிரான சக்திகளின் உருவமாகவே ராகுல் செயல்படுகிறார்,” என விமர்சித்துள்ளார்.
