தவெக எம்.எல்.ஏ.க்களை விலைக்கு வாங்க ஸ்டாலின் முயற்சி: நிர்மல் குமார் குற்றச்சாட்டு

மதுரை: தவெக எம்.எல்.ஏ. முஸ்தபாவிடம் பேரம் பேசியதாக எழுந்த விவகாரம் தொடர்பாக, மதுரையில் அமைச்சர் நிர்மல் குமார் செய்தியாளர்களைச் சந்தித்துப் பேசினார்.

அப்போது அவர், அதிமுக மட்டுமின்றி திமுகவைச் சேர்ந்தவர்களும் ஏற்கனவே கைது செய்யப்பட்டுள்ளதாகக் குறிப்பிட்டார். தேர்தல் முடிவடைந்த சமயத்தில் பல தவெக எம்.எல்.ஏ.க்களிடம் பேரம் பேச முயற்சி நடைபெற்றதாகவும், கரூரைச் சேர்ந்த சில முக்கிய நபர்கள் கைது செய்யப்பட்டுள்ளதாகவும் தெரிவித்தார்.

மேலும், தவெக எம்.எல்.ஏ.க்களை விலைக்கு வாங்குவதற்கு முதல்வர் ஸ்டாலினும், உதயநிதியும் தொடர்ந்து முயற்சி செய்து வருவதாக நிர்மல் குமார் குற்றம்சாட்டினார். அதனால்தான் தற்போதைய ஆட்சி இன்னும் சில மாதங்கள்தான் நீடிக்கும் என்று அவர்கள் கூறி வருவதாகவும் விமர்சித்தார்.

தவெக எம்.எல்.ஏ.க்களை விலைக்கு வாங்கி, பாஜக ஆதரவுடன் எடப்பாடி பழனிசாமியும் திமுகவும் இணைந்து ஆட்சியமைக்க முயற்சி செய்வதாகவும் அவர் குற்றம்சாட்டினார். கடந்த முறையும் பொதுவேட்பாளரை நிறுத்தி இரு கட்சிகளும் ஒன்றாகச் செயல்படத் திட்டமிட்டதாகவும், கட்சிக்குள் எதிர்ப்பு எழுந்ததால் அந்த முயற்சி கைவிடப்பட்டதாகவும் கூறினார்.

அடுத்து நடைபெற உள்ள இடைத்தேர்தல்களில் திமுகவும் அதிமுகவும் இணைந்து பொதுவேட்பாளரை நிறுத்த முடிவு செய்துள்ளதாகவும் நிர்மல் குமார் தெரிவித்தார். அதற்கும் கட்சிக்குள் எதிர்ப்பு ஏற்பட்டால் தனித்தனியாக வேட்பாளர்களை நிறுத்தலாம் என்றும் குறிப்பிட்டார்.

தவெக எம்.எல்.ஏ.க்களை விலைக்கு வாங்க வேண்டிய அவசியம் தங்களுக்கு இல்லை என்றும், திமுகவினரிடம் பெருமளவு பணம் இருப்பதாகவும் கூறிய அவர், அதை வைத்து எம்.எல்.ஏ.க்களை இழுக்கும் முயற்சியில் திமுக ஈடுபட்டு வருவதாகக் குற்றம்சாட்டினார்.

திமுக போன்ற கட்சிகளால்தான் தொடர்ந்து பிரச்சினைகள் ஏற்படுவதாக விமர்சித்த நிர்மல் குமார், மூன்று மாதங்களில் ஆட்சிக்கு வந்துவிடுவோம் என்ற கூற்று 100 சதவீதம் நடக்காது என்றும் தெரிவித்தார்.