ஹவானா: Cuba நாட்டில் நீடித்து வரும் பொருளாதார மற்றும் மின்சார நெருக்கடிகளுக்கு மத்தியில், அமெரிக்க உளவு அமைப்பான Central Intelligence Agency (சிஐஏ) இயக்குநர் John Ratcliffe கியூபாவிற்கு பயணம் மேற்கொண்டுள்ளார்.
கரீபியன் தீவு நாடான கியூபாவில் கம்யூனிஸ்ட் ஆட்சி நீண்ட காலமாக இருந்து வருகிறது. அந்த ஆட்சிக்கு எதிராக அமெரிக்கா பல தசாப்தங்களாக பொருளாதார தடைகள் மற்றும் அரசியல் அழுத்தங்களை மேற்கொண்டு வருகிறது.
முன்னாள் சோவியத் யூனியன் மற்றும் பின்னர் Venezuela ஆகிய நாடுகள் கியூபாவிற்கு உதவிகளை வழங்கி வந்தன. ஆனால் வெனிசுலாவில் ஏற்பட்ட அரசியல் மாற்றங்களுக்குப் பிறகு அந்த உதவிகள் குறைந்ததால், கியூபா கடுமையான எரிபொருள் மற்றும் மின்சார நெருக்கடியை சந்தித்து வருகிறது.
தலைநகர் ஹவானா உள்ளிட்ட பல பகுதிகளில் நீண்ட நேர மின்வெட்டு நிலவி வருகிறது. சில இடங்களில் நாளொன்றுக்கு 20 மணி நேரம் வரை மின்விநியோகம் தடைபடுவதால் மக்கள் போராட்டங்களில் ஈடுபட்டு வருகின்றனர்.
இந்த நிலையில், அமெரிக்க சிஐஏ இயக்குநர் ஜான் ராட்க்ளிப் கியூபாவிற்கு பயணம் மேற்கொண்டது முக்கியத்துவம் வாய்ந்ததாக பார்க்கப்படுகிறது. இந்த பயணத்தை இரு நாடுகளும் அதிகாரப்பூர்வமாக உறுதி செய்துள்ளன.
பயணத்தின் போது, கியூபா உயர் அதிகாரிகள் மற்றும் முன்னாள் அதிபர் Fidel Castroவின் பேரன் கில்லெர்மோ ரோட்ரிகஸை ஜான் ராட்க்ளிப் சந்தித்து பேசியதாக தகவல் வெளியாகியுள்ளது.
மேலும், கியூபா உள்துறை அமைச்சர் லாசரோ அல்வாரெஸ் கசாஸ் மற்றும் பாதுகாப்பு அதிகாரிகளுடனும் அவர் ஆலோசனை நடத்தியுள்ளார்.
அமெரிக்க அதிபர் Donald Trump தலைமையிலான நிர்வாகம், “கியூபா தனது கொள்கைகளில் அடிப்படை மாற்றங்களை மேற்கொண்டால் மட்டுமே பொருளாதார மற்றும் பாதுகாப்பு தொடர்பான விஷயங்களில் அமெரிக்கா ஆக்கபூர்வமாக செயல்படும்” என்ற நிலைப்பாட்டை எடுத்துள்ளதாக கூறப்படுகிறது.
இந்த சந்திப்பு மற்றும் பேச்சுவார்த்தைகள் காரணமாக, கியூபாவில் அரசியல் மற்றும் நிர்வாக மாற்றங்கள் ஏற்படுமா என்ற விவாதம் சர்வதேச அளவில் அதிகரித்துள்ளது.
