திருப்பரங்குன்றம்: Thiruparankundram Murugan Temple கோயிலில் அமைச்சர் Nirmal Kumar தரிசனம் செய்ததையடுத்து, கோயில் நடை அடைப்பு நேரம் மாற்றப்பட்டதாக கூறப்படும் விவகாரம் சர்ச்சையை ஏற்படுத்தியுள்ளது.
சென்னையிலிருந்து நேற்று காலை மதுரை வந்த அமைச்சர் நிர்மல் குமார், திருப்பரங்குன்றம் தொகுதியில் நடைபெற்ற பல்வேறு நிகழ்ச்சிகளில் பங்கேற்றார். பின்னர் மதியம் 12:55 மணியளவில் சுப்பிரமணிய சுவாமி கோயிலுக்கு தரிசனத்திற்காக வந்தார்.
கோயில் முன்பாக கட்சியினர் அவரை வரவேற்றனர். கோயிலுக்குள் சென்ற அமைச்சருக்கு கோயில் நிர்வாகம் சார்பில் பூரண கும்ப மரியாதை அளிக்கப்பட்டது. துணை கமிஷனர் ஞானசேகரன், அறங்காவலர்கள் சண்முகசுந்தரம், ராமையா மற்றும் கண்காணிப்பாளர் சத்தியசீலன் ஆகியோர் வரவேற்றனர்.
அதன்பின் அமைச்சர், 50க்கும் மேற்பட்ட ஆதரவாளர்களுடன் மூலஸ்தானத்திற்கு சென்று தரிசனம் செய்தார். வழக்கமாக கோயிலில் மதியம் 12:30 மணிக்கு உச்சிகால பூஜை தொடங்கும். அதன் பின்னர் மதியம் 12:45 மணிக்கு ராஜகோபுரம் கீழ் உள்ள பெரிய கதவுகள் மூடப்பட்டு, பக்தர்கள் உள்ளே அனுமதிக்கப்பட மாட்டார்கள்.
விழா நாட்கள் அல்லது சிறப்பு தருணங்களைத் தவிர, பக்தர்கள் கூட்டம் அதிகமாக இருந்தாலும் கூட நடை அடைப்பு நேரத்தில் மாற்றம் செய்யப்படுவதில்லை என்று கூறப்படுகிறது.
ஆனால் நேற்று அமைச்சர் நிர்மல் குமார் மதியம் 1 மணிக்கு பிறகும் கோயிலுக்குள் சென்று தரிசனம் செய்ததாக தகவல் வெளியாகியுள்ளது. அவர் மதியம் 1:06 மணியளவில் மூலஸ்தானத்தில் தரிசனம் செய்து, 1:15 மணிக்கு வெளியே வந்த பின்னரே கோயில் நடை சாத்தப்பட்டதாக கூறப்படுகிறது.
மேலும், வழக்கமாக பக்தர்கள் மடப்பள்ளி மண்டபம் மற்றும் சஷ்டி மண்டபம் வழியாக வெளியே அனுப்பப்படுவார்கள். ஆனால் அமைச்சருக்காக பெரிய நிலை கதவு திறக்கப்பட்டு, முன்பக்க வாசல் வழியாக வெளியே அழைத்துச் செல்லப்பட்டதாகவும் கூறப்படுகிறது.
இந்த சம்பவம் தொடர்பான வீடியோ சமூக வலைதளங்களில் வைரலாக பரவிய நிலையில், பல பக்தர்கள் அதிருப்தி தெரிவித்துள்ளனர்.
