சென்னை: Dravida Munnetra Kazhagam மாவட்ட செயலாளர்கள் கூட்டம் இன்று சென்னை அண்ணா அறிவாலயத்தில் நடைபெற்றது. கட்சித் தலைவர் M. K. Stalin தலைமையில் நடைபெற்ற இந்த கூட்டத்தில், தேர்தல் தோல்விக்கான காரணங்கள் மற்றும் எதிர்க்கட்சியாக செயல்பட வேண்டிய நடைமுறைகள் குறித்து ஆலோசிக்கப்பட்டது.
கூட்டத்தில் உரையாற்றிய ஸ்டாலின், “என்ன ஆனாலும் சூரியன் ஒருபோதும் மறையாது. அது மீண்டும் உதித்தே தீரும். இது இயற்கை நியதி மட்டுமல்ல, தமிழக அரசியல் நியதியும் கூட” என்று கூறி கட்சியினருக்கு நம்பிக்கை அளித்தார்.
சமீபத்தில் நடைபெற்ற சட்டசபை தேர்தலில் எந்தக் கட்சிக்கும் தனிப்பெரும்பான்மை கிடைக்கவில்லை என்றும், தற்போது அமைந்துள்ள அரசும் கூட்டணி கட்சிகளின் ஆதரவோடு தான் ஆட்சியை அமைத்துள்ளதாகவும் அவர் குறிப்பிட்டார்.
“நமக்கு பெரும்பான்மை கிடைக்கவில்லை என்றாலும், கணிசமான வாக்குகள் கிடைத்துள்ளன. கடந்த கால தேர்தல் வரலாற்றைப் பார்த்தால், ஆட்சியில் இருந்து தோற்றபோது மிகக் குறைந்த இடங்களிலேயே வெற்றி பெற்றிருக்கிறோம். ஆனால் தற்போது 59 இடங்களில் வெற்றி பெற்றுள்ளோம். கூட்டணியுடன் சேர்த்து பார்த்தால் 73 இடங்கள் கிடைத்துள்ளன” என்று அவர் தெரிவித்தார்.
மேலும், “திமுகதான் வெற்றி பெறும் என்று நினைத்து சிலர் அலட்சியமாக வாக்களித்ததாக தற்போது சமூக வலைதளங்களில் பலர் வருத்தப்படுகிறார்கள். இது கடந்த ஐந்து ஆண்டுகளில் நாம் வழங்கிய ஆட்சிக்கு கிடைத்த அங்கீகாரம்” என்றும் கூறினார்.
தொடர்ந்து பேசிய அவர், “கடந்த ஐந்து ஆண்டுகளும் நான் கடுமையாக உழைத்தேன். உங்களையும் ஓய்வில்லாமல் உழைக்க வைத்தேன். இதுவரை எந்த அரசும் செய்யாத பல சாதனைகளை நாம் செய்துள்ளோம். இருந்தாலும் ஆட்சியை அமைக்க முடியவில்லை” என்று தெரிவித்தார்.
“இந்த தோல்விக்காக யாரையும் குறை சொல்ல விரும்பவில்லை. தலைவர் என்ற முறையில் இந்த தோல்விக்கு நானே முழு பொறுப்பேற்கிறேன்” என்று ஸ்டாலின் கூறியபோது கூட்டத்தில் இருந்த நிர்வாகிகள் உணர்ச்சி வசப்பட்டதாக கூறப்படுகிறது.
மேலும், தேர்தல் தோல்வி குறித்து ஒருவரை ஒருவர் குறை கூற வேண்டாம் என்றும், “ஆய்வு செய்வது அவசியம். ஆனால் அது அவதூறாக மாறக்கூடாது” என்று அவர் அறிவுறுத்தினார்.
இந்த தேர்தலில் ஏற்பட்ட நிலையை “புதுவிதமான கவர்ச்சி மாயாஜால சுனாமி” என விவரித்த ஸ்டாலின், “இது தமிழகத்தின் நலன்களை பாதித்த பேரழிவு. இதிலிருந்து மக்களை எப்படி மீட்பது என்பதையே நாம் சிந்திக்க வேண்டும்” என்றார்.
தொகுதி வாரியாக தோல்விக்கான காரணங்களை ஆய்வு செய்ய ஒரு குழு அமைக்கப்படும் என்றும், அந்த குழு தமிழகம் முழுவதும் நிர்வாகிகளை சந்தித்து 20 நாட்களுக்குள் அறிக்கை சமர்ப்பிக்கும் என்றும் அவர் அறிவித்தார்.
மேலும், கட்சியினர் சமூக வலைதளங்களில் நேரடியாக செயல்பட வேண்டும் என்றும், விரைவில் கட்சியை மறுசீரமைத்து புதிய உற்சாகத்துடன் செயல்படுவோம் என்றும் தெரிவித்தார்.
“ஒற்றுமை இல்லாமல் வெற்றி சாத்தியமில்லை. கோஷ்டி அரசியலை விட்டு எல்லாரையும் அரவணைத்து செயல்படுங்கள். இந்த தோல்வி தற்காலிகம் தான். மீண்டும் வெற்றியை நோக்கி பயணிப்போம்” என்று ஸ்டாலின் தனது உரையை நிறைவு செய்தார்.
