புதுடில்லி: ஆக்ரோஷமாகவும் நோய்வாய்ப்பட்டும் இருக்கும் தெருநாய்களை சட்டப்படி கருணைக்கொலை செய்யலாம் என சுப்ரீம் கோர்ட் உத்தரவிட்டுள்ளது.
நாட்டில் வெறிநாய்க்கடி மற்றும் அதனால் ஏற்படும் ரேபிஸ் பாதிப்புகள் அதிகரித்து உயிரிழப்புகள் அதிகமான நிலையில், இதுதொடர்பான செய்திகளை அடிப்படையாக கொண்டு சுப்ரீம் கோர்ட் தானாக முன்வந்து வழக்குப்பதிவு செய்து விசாரணை மேற்கொண்டது.
இதையடுத்து கடந்த 2025ஆம் ஆண்டு நவம்பர் 25ஆம் தேதி, பள்ளிகள், மருத்துவமனைகள் மற்றும் ரயில் நிலையங்கள் உள்ளிட்ட பொதுமக்கள் அதிகம் கூடும் பகுதிகளில் இருந்து தெருநாய்களை அகற்றுமாறு சுப்ரீம் கோர்ட் உத்தரவிட்டது.
இந்த உத்தரவை திரும்ப பெறக்கோரி நாய் பிரியர்கள் மற்றும் விலங்கு நல அமைப்புகள் சார்பில் மனுக்கள் தாக்கல் செய்யப்பட்டிருந்தன.
இந்த வழக்கை இன்று விசாரித்த Supreme Court of India நீதிபதி Vikram Nath தலைமையிலான மூன்று நீதிபதிகள் அமர்வு முக்கிய உத்தரவுகளை பிறப்பித்தது.
அதில், “ஒவ்வொரு மாவட்டத்திலும் குறைந்தபட்சம் ஒரு விலங்குகளுக்கான கருத்தடை மையம் அமைக்கப்பட வேண்டும். மக்கள் தொகையை கருத்தில் கொண்டு கருத்தடை மையங்களின் எண்ணிக்கையை அதிகரிக்க வேண்டும்,” என்று கூறப்பட்டுள்ளது.
மேலும், “கண்ணியத்துடன் வாழும் உரிமை என்பது நாய்க்கடி அச்சுறுத்தலின்றி சுதந்திரமாக வாழும் உரிமையையும் உள்ளடக்கியது. இந்த விஷயத்தில் அரசு செயலற்ற பார்வையாளராக இருக்க முடியாது,” என்றும் நீதிபதிகள் தெரிவித்தனர்.
தெருநாய்கள் மூலம் பொதுமக்களுக்கு ஏற்படும் ஆபத்தை தடுக்க மாநில அரசுகள் கடும் நடவடிக்கை எடுக்க வேண்டும் என்றும், மனித உயிர்களுக்கு பாதுகாப்பு அளிக்கும் வகையில் நோய்வாய்ப்பட்ட மற்றும் ஆக்ரோஷமாக இருக்கும் தெருநாய்களை சட்டப்படி அனுமதிக்கப்பட்ட நடைமுறைகளின் அடிப்படையில் கருணைக்கொலை செய்வது உள்ளிட்ட நடவடிக்கைகள் எடுக்கப்பட வேண்டும் என்றும் நீதிமன்றம் உத்தரவிட்டது.
மேலும், தெருநாய்களை பொது இடங்களில் இருந்து அகற்ற வேண்டும் என்ற முந்தைய உத்தரவை எதிர்த்து தாக்கல் செய்யப்பட்ட மனுக்களை சுப்ரீம் கோர்ட் தள்ளுபடி செய்தது.
