ராகுலுக்கு கிரண் ரிஜிஜு 7 நிபந்தனைகள்: வெளிநாட்டுப் பயணங்களைத் தவிர்த்து இந்தியாவில் நேரம் செலவிட அறிவுரை!

புதுடில்லி: காங்கிரஸ் கட்சி நாடாளுமன்றத்தில் கூடுதல் எம்.பி.,க்களைப் பெற வேண்டுமானால், ராகுல் காந்தி 7 நிபந்தனைகளைப் பின்பற்ற வேண்டும் என மத்திய அமைச்சர் கிரண் ரிஜிஜு தெரிவித்துள்ளார். குறிப்பாக, அடிக்கடி வெளிநாடுகளுக்கு ரகசியமாகச் செல்வதைத் தவிர்த்து, இந்தியாவில் அதிக நேரம் செலவிட வேண்டும் என்றும் அவர் வலியுறுத்தியுள்ளார்.

ராகுலுக்கு கிரண் ரிஜிஜு கூறிய 7 நிபந்தனைகள்

பிரதமர் மோடி நேரடி விவாதத்திற்குத் தயாரா என ராகுல் காந்தி விடுத்த சவாலுக்குப் பதிலளிக்கும் வகையில், மத்திய நாடாளுமன்ற விவகாரங்கள் துறை அமைச்சர் கிரண் ரிஜிஜு தனது சமூக வலைதளப் பக்கத்தில் 7 நிபந்தனைகளைப் பட்டியலிட்டுள்ளார்.

1. வெளிநாட்டுப் பயணங்களைக் குறைக்க வேண்டும்:

அடிக்கடி வெளிநாடுகளுக்கு ரகசியமாக விடுமுறைக்குச் செல்வதைத் தவிர்த்து, இந்தியாவில் அதிக நேரம் செலவிட வேண்டும் எனக் கூறியுள்ளார்.

2. மூத்தவர்களை மதிக்க வேண்டும்:

இந்தியக் கலாசார மற்றும் பாரம்பரிய முறைகளின்படி முதியோர்களையும், மூத்த தலைவர்களையும் மதித்து, அவர்களிடமிருந்து பாடங்களைக் கற்றுக்கொள்ள வேண்டும் எனத் தெரிவித்துள்ளார்.

3. இந்திய எதிர்ப்பு சக்திகளுடன் தொடர்பைத் தவிர்க்க வேண்டும்:

இந்தியாவுக்கு எதிரான சக்திகளைச் சந்திப்பதையும், அவர்களின் உள்நோக்கங்களுக்குத் துணைபோவதையும் கைவிட வேண்டும் என வலியுறுத்தியுள்ளார்.

4. அரசியல் வெறுப்பைக் கைவிட வேண்டும்:

பா.ஜ., ஆர்.எஸ்.எஸ். மற்றும் பிரதமர் மோடி மீதான அதீத வெறுப்பைக் கைவிட வேண்டும் எனக் கூறியுள்ளார். பா.ஜ.,வை அரசியல் எதிரியாகக் கருதலாமே தவிர, நிரந்தரப் பகையாளியாகப் பார்க்கக் கூடாது என்றும் தெரிவித்துள்ளார்.

5. நாடாளுமன்ற நடவடிக்கைகளில் கவனம் செலுத்த வேண்டும்:

நாடாளுமன்ற நடவடிக்கைகளைத் தீவிரமாக எடுத்துக்கொண்டு, சக எம்.பி.,க்கள் விவாதங்களிலும் ஆக்கப்பூர்வமான ஆலோசனைகளிலும் பங்கேற்க அனுமதிக்க வேண்டும் எனக் குறிப்பிட்டுள்ளார்.

6. அரசியலமைப்புக்கு மரியாதை அளிக்க வேண்டும்:

நாட்டின் அரசியலமைப்பையும், தன்னாட்சி அமைப்புகளையும் உளப்பூர்வமாக மதிக்க வேண்டும் என வலியுறுத்தியுள்ளார்.

7. வாரிசு அரசியலைக் கைவிட வேண்டும்:

காங்கிரஸ் கட்சியை ஜனநாயக ரீதியில் செயல்பட அனுமதித்து, நீண்டகாலமாகத் தொடரும் குடும்ப மற்றும் வாரிசு அரசியலுக்கு முற்றுப்புள்ளி வைக்க வேண்டும் எனக் கூறியுள்ளார்.

இந்த 7 நிபந்தனைகளையும் ராகுல் காந்தி பின்பற்றினால், வரும் தேர்தலில் காங்கிரஸ் கட்சி கூடுதல் நாடாளுமன்ற உறுப்பினர்களைப் பெற வாய்ப்புள்ளதாக கிரண் ரிஜிஜு தெரிவித்துள்ளார்.