திருப்பரங்குன்றம் தீபத்தூணில் கார்த்திகை தீபம் ஏற்ற வேண்டும்: இந்து முன்னணி வலியுறுத்தல்

– நமது நிருபர் –

மதுரை திருப்பரங்குன்றத்தில் உள்ள மாதா அமிர்தானந்தமயி மடத்தில், இந்து முன்னணி சார்பில் 12 ஜோதிர்லிங்க வழிபாட்டைத் தொடங்கி வைத்த பின்னர், அந்த அமைப்பின் மாநிலத் தலைவர் காடேஸ்வரா சுப்பிரமணியன் செய்தியாளர்களிடம் பேசினார்.

அப்போது, திருப்பரங்குன்றம் மலைமீதுள்ள தீபத்தூணில் இந்த ஆண்டு கார்த்திகை தீபம் ஏற்ற வேண்டும் என வலியுறுத்தினார். இதற்காக நடைபெறவுள்ள கிரிவலத்தில் முருக பக்தர்களும் இந்து அமைப்பினரும் பங்கேற்க உள்ளதாகத் தெரிவித்தார்.

நீதிமன்றம் வழங்கிய தீர்ப்பை மதித்து தீபம் ஏற்ற வேண்டும் என்றும், நவம்பர் 24-ஆம் தேதி தீபத்தூணில் தீபம் ஏற்றப்படுவதைப் பார்ப்பதற்குப் பல லட்சம் மக்கள் வர வேண்டும் என்றும் அவர் கேட்டுக்கொண்டார்.

கடந்த திமுக ஆட்சியில் நீதிமன்றத் தீர்ப்பை மதிக்காததால், மாவட்ட ஆட்சியரும் காவல் ஆணையரும் மன்னிப்புக் கேட்கும் சூழல் ஏற்பட்டதாக அவர் குற்றம்சாட்டினார். தற்போதைய அரசு அத்தகைய சூழலை உருவாக்காது என நம்புவதாகவும் கூறினார்.

விநாயகர் சதுர்த்தி, கிருஷ்ண ஜெயந்தி ஆகிய பண்டிகைகளுக்கு வாழ்த்து தெரிவித்த முதல்வர் விஜய், திருப்பரங்குன்றம் மலைமீதுள்ள தீபத்தூணில் கார்த்திகை தீபம் ஏற்றுவதற்கு இந்து சமய அறநிலையத் துறைக்கு உத்தரவிடுவார் என எதிர்பார்ப்பதாகவும் தெரிவித்தார்.

மேலும், திருப்பரங்குன்றம் தொகுதியில் இந்துக்களின் வாக்குகளும் கிடைத்ததால்தான் நிர்மல்குமார் வெற்றி பெற்று அமைச்சராகியுள்ளதாகக் குறிப்பிட்ட அவர், தனது நிலைப்பாட்டை மாற்றிக்கொள்ள வேண்டும் என வலியுறுத்தினார். இல்லையெனில், எதிர்காலத்தில் அவர் அரசியல் செய்வது சிரமமாகிவிடும் என்றும் காடேஸ்வரா சுப்பிரமணியன் தெரிவித்தார்.