புதுக்கோட்டை: அர்ஜுன்சம்பத், தமிழக சட்டசபையில் சனாதனம் குறித்து உதயநிதி ஸ்டாலின் பேசியது கண்டனத்துக்குரியது என தெரிவித்துள்ளார்.
புதுக்கோட்டையில் உள்ள புவனேஸ்வரி அம்மன் திருக்கோவில்வில் சாமி தரிசனம் செய்த பிறகு செய்தியாளர்களிடம் அவர் பேசியபோது, “தமிழகத்தில் சனாதன தர்மத்தை ஒழிக்க வேண்டும் என்று கூறி இந்து தர்மத்திற்கு எதிராக பிரச்சாரங்கள் நடத்தப்பட்டன. அந்த இந்து விரோத ஆட்சி தோற்கடிக்கப்பட வேண்டும் என்று தேர்தலுக்கு முன்பு வேண்டிக்கொண்டேன். தற்போது திமுக தோல்வியடைந்துள்ளது” என்றார்.
மேலும், “விஜய் தலைமையிலான அரசு அமைந்துள்ள இந்த சூழலில், சட்டசபையில் உதயநிதி மீண்டும் சனாதனம் குறித்து பேசியுள்ளார். சனாதன தர்மத்தை அழிக்க நினைப்பவர்கள் தான் அழிந்து போவார்கள்; சனாதன தர்மத்தை யாராலும் அழிக்க முடியாது” என்றும் கூறினார்.
அதேபோல், “தமிழக அரசு இயந்திரம் தற்போது கிறிஸ்துவ மிஷனரிகளின் கட்டுப்பாட்டில் உள்ளது. சபாநாயகர் ஜேசிடி பிரபாகர் பைபிளை மேற்கோள் காட்டி பேசுகிறார். அவர் கிறிஸ்துவராக இருப்பதில் தவறு இல்லை. ஆனால் சட்டசபைக்குள் பைபிள் குறித்து பேசுவதும், உதயநிதி சனாதனம் குறித்து பேசுவதை அனுமதித்ததும் கண்டனத்துக்குரியது” என்று விமர்சித்தார்.
உதயநிதியின் பேச்சை அவைக்குறிப்பில் இருந்து நீக்கியிருக்க வேண்டும் என்றும், சட்டசபைக்கு வெளியே பேசினால் வழக்கு வரும் என்பதால் அவர் சட்டசபைக்குள் இதை பேசியுள்ளார் என்றும் அர்ஜுன்சம்பத் குற்றம்சாட்டினார்.
மேலும், முதல்வர் விஜய் திருச்செந்தூர், சாய்பாபா கோவில், நாகூர் தர்கா மற்றும் வேளாங்கண்ணி உள்ளிட்ட பல்வேறு மத தலங்களுக்கு சென்றது குறித்தும் அவர் கருத்து தெரிவித்தார்.
அதேபோல், “புஷ்பா மாடல் ஆட்சி” குறித்து உதயநிதி கூறிய விமர்சனத்துக்கும் பதிலளித்த அர்ஜுன்சம்பத், “சோபா விவகாரம் குறித்து திருமாவளவனிடம் கேட்டாலே உண்மை தெரியும்” என்றும் கூறினார்.
இறுதியாக, தமிழக அரசின் செயல்பாடுகளை விமர்சிப்பதற்கு முன் புதிய அரசுக்கு குறைந்தது 100 நாட்கள் அவகாசம் வழங்க வேண்டும் என்றும் அவர் தெரிவித்தார்.
