தமிழக வெற்றிக் கழக நிர்வாகிகள் பொதுமக்களுக்கு இடையூறு ஏற்படுத்தும் வகையில் எந்தவித கொண்டாட்டங்களிலும் ஈடுபடக்கூடாது என்று கட்சி தலைமை எச்சரிக்கை விடுத்துள்ளது.
கள்ளக்குறிச்சி மாவட்ட செயலாளர் பரணி பாலாஜி தனது பிறந்தநாளை முன்னிட்டு திருக்கோவிலூர் சாலையில் பட்டாசு வெடித்து கொண்டாடியதாக கூறப்படுகிறது. இதனால் அந்த பகுதியில் கடும் போக்குவரத்து நெரிசல் ஏற்பட்டதுடன், பொதுமக்களும் பாதிக்கப்பட்டனர்.
இந்த சம்பவம் தொடர்பான வீடியோக்கள் சமூக வலைதளங்களில் பரவிய நிலையில், “ஆட்சிக்கு வந்த உடனே த.வெ.க.வினர் பொதுமக்களுக்கு இடையூறு செய்கிறார்கள்” என்று பலரும் விமர்சனம் செய்தனர்.
இதையடுத்து, த.வெ.க. பொதுச்செயலாளரும் அமைச்சருமான Anand அறிக்கை வெளியிட்டுள்ளார்.
அந்த அறிக்கையில், “தமிழக மக்களின் நம்பிக்கையை பெற்ற முதல்வர் Vijay நமக்கு பெரிய பொறுப்பை வழங்கியுள்ளார். எனவே, கட்சியினர் தங்களது பிறந்தநாள் மற்றும் குடும்ப விழாக்களை மக்கள் மற்றும் போக்குவரத்துக்கு இடையூறு ஏற்படுத்தும் வகையில் சாலைகளிலோ, பொதுமக்கள் கூடும் இடங்களிலோ நடத்தக்கூடாது” என்று தெரிவிக்கப்பட்டுள்ளது.
மேலும், பேனர்கள் மற்றும் பதாகைகள் வைப்பதிலும் கட்டுப்பாடு கடைபிடிக்க வேண்டும் என்றும், பொதுமக்களுக்கு இடையூறு ஏற்படுத்தும் வகையில் யாரேனும் செயல்பட்டால், அவர்கள் மீது கடுமையான நடவடிக்கை எடுக்கப்படும் என்றும் எச்சரிக்கப்பட்டுள்ளது.
இதற்கிடையில், கள்ளக்குறிச்சி மாவட்ட செயலாளர் பரணி பாலாஜி கடந்த 2024ஆம் ஆண்டு கட்சி பதவி கிடைத்தபோதும், 2025ஆம் ஆண்டு தனது பிறந்தநாளிலும் இதேபோல் சாலை மறித்து விழா நடத்தியதாகவும், அப்போதும் எச்சரிக்கை மட்டும் விடுக்கப்பட்டதே தவிர நடவடிக்கை எடுக்கப்படவில்லை என்றும் கட்சியினர் கூறுகின்றனர்.
