புதுடில்லி: எஸ். ஜெய்சங்கர், ரஷ்ய கச்சா எண்ணெய் இறக்குமதி தொடர்பாக அமெரிக்கா விதித்த தடைகள் மற்றும் வரிகள் குறித்து, “சர்வதேச சட்டத்துக்கு முரணான ஒருதலைப்பட்ச நடவடிக்கைகள் கவலைக்குரியவை” என்று மறைமுகமாக விமர்சித்துள்ளார்.
டெல்லியில் நடைபெற்ற பிரிக்ஸ் வெளியுறவு அமைச்சர்கள் கூட்டத்தில் பேசிய அவர், உலகம் தற்போது போர், காலநிலை மாற்றம் மற்றும் கொரோனா பெருந்தொற்றின் பிந்தைய விளைவுகள் காரணமாக பெரும் அழுத்தத்தை எதிர்கொண்டு வருவதாக தெரிவித்தார்.
இந்த சவால்கள் வளர்ந்து வரும் நாடுகளின் பொருளாதாரத்தை பாதிப்பதோடு, பன்முகத்தன்மை கொண்ட சர்வதேச அமைப்புகளுக்கும் சிரமத்தை ஏற்படுத்துவதாகவும் அவர் குறிப்பிட்டார்.
மேலும், “சர்வதேச சட்டம் மற்றும் ஐக்கிய நாடுகள் சபை சாசனத்திற்கு முரணான ஒருதலைப்பட்ச பொருளாதார தடைகள் மற்றும் நடவடிக்கைகளை எதிர்கொள்ள வேண்டிய நிலை ஏற்பட்டுள்ளது. இத்தகைய செயல்கள் வளரும் நாடுகளை அதிகமாக பாதிக்கின்றன. அழுத்தங்கள் மூலம் எந்த பிரச்னைக்கும் தீர்வு காண முடியாது” என்று ஜெய்சங்கர் தெரிவித்தார்.
சமீபத்திய போர்கள் பேச்சுவார்த்தையின் அவசியத்தை மீண்டும் உணர்த்தியுள்ளதாகவும், உலக அமைதி மற்றும் பாதுகாப்பை உறுதி செய்வதில் பிரிக்ஸ் நாடுகள் முக்கிய பங்கு வகிக்க வேண்டும் என்றும் அவர் கூறினார்.
மேற்காசிய பகுதியில் நிலவும் போர் சூழல் எரிசக்தி விநியோகம், உணவு மற்றும் உர பாதுகாப்பு, பணவீக்கம் ஆகியவற்றில் கடும் தாக்கத்தை ஏற்படுத்தியுள்ளதாகவும் அவர் எச்சரித்தார்.
குறிப்பாக ஹார்முஸ் ஜலசந்தி மற்றும் செங்கடல் போன்ற முக்கிய கடல்சார் வழிகளில் தடையற்ற போக்குவரத்து உலக பொருளாதாரத்திற்கு அவசியம் என்றும் அவர் தெரிவித்தார்.
மேலும், காசா பகுதியில் நீடித்து வரும் மனிதாபிமான நெருக்கடி குறித்து கவலை தெரிவித்த அவர், அங்கு உடனடி போர்நிறுத்தமும் மனிதாபிமான உதவிகளும் அவசியம் என்றார்.
லெபனான், சிரியா, சூடான் மற்றும் ஏமன் போன்ற நாடுகளில் நிலவும் பதற்றத்தை தணிக்க தொடர்ச்சியான பேச்சுவார்த்தைகள் அவசியம் என்றும் ஜெய்சங்கர் வலியுறுத்தினார்.
