வன்முறை போராட்டங்களால் பதற்றம்: நெருக்கடியில் பிரான்ஸ் அரசு

பாரிஸ்: பொருளாதார நெருக்கடி, விலைவாசி உயர்வு மற்றும் கல்வி தொடர்பான பிரச்னைகளை முன்வைத்து ஐரோப்பிய நாடுகளில் நடைபெறும் போராட்டங்கள் சில இடங்களில் வன்முறையாக மாறியுள்ளன. பிரான்ஸ், இத்தாலி, அல்பேனியா, பெல்ஜியம் உள்ளிட்ட நாடுகளில் போராட்டங்கள் தீவிரமடைந்துள்ள நிலையில், பிரான்ஸ் அரசு சட்டம் ஒழுங்கைப் பாதுகாப்பதில் சவால்களை எதிர்கொண்டுள்ளது.

பிரான்சில் தொடங்கிய போராட்டங்கள் நாளடைவில் பல்வேறு பகுதிகளுக்குப் பரவின. தொடக்கத்தில் கல்வி வசதிகள் போதுமானதாக இல்லை என்பதை எதிர்த்து பாரிஸில் மாணவர் அமைப்புகள் போராட்டங்களை முன்னெடுத்தன. ஆசிரியர்களும் இதில் பங்கேற்றனர். பின்னர் விலைவாசி உயர்வு உள்ளிட்ட பிரச்னைகளை முன்வைத்து மற்ற அமைப்புகளும் போராட்டங்களில் இணைந்தன.

இதற்கிடையே, சில குழுக்கள் வன்முறையில் ஈடுபட்டதாகக் கூறப்படுகிறது. கருப்பு உடைகள் மற்றும் முகமூடிகளை அணிந்திருந்த சிலர் கடைகளை உடைத்துச் சூறையாடியதுடன், தீவைப்பு சம்பவங்களிலும் ஈடுபட்டதாகத் தகவல்கள் வெளியாகின. அமைதியாகத் தொடங்கிய போராட்டங்கள், சில இடங்களில் போலீசாருக்கும் போராட்டக்காரர்களுக்கும் இடையிலான மோதல்களாக மாறின.

கடந்த வாரம் பாரிஸில் ஐந்து லட்சத்துக்கும் மேற்பட்டோர் போராட்டத்தில் பங்கேற்றதாகத் தெரிவிக்கப்பட்டது. போராட்டம் அமைதியாக நடைபெற்றுக் கொண்டிருந்த நிலையில், சிலர் வன்முறையில் ஈடுபட்டது நிலைமையை மேலும் தீவிரப்படுத்தியதாகக் கூறப்படுகிறது.

இதற்கிடையே, லிமோஜஸ் நகரில் சுமார் 140 ஆண்டுகள் பழமையான டவுன் ஹால் கட்டடத்துக்குத் தீ வைக்கப்பட்டதாகச் செய்தி வெளியாகியுள்ளது. இரு உலகப் போர்களின்போதும் தப்பிய அந்த வரலாற்றுச் சிறப்புமிக்க கட்டடம், தற்போதைய வன்முறையில் சேதமடைந்ததாகத் தெரிவிக்கப்பட்டுள்ளது.

பாரிஸில் போலீசாருக்கும் போராட்டக்காரர்களுக்கும் இடையே ஏற்பட்ட மோதல்களில் 150க்கும் மேற்பட்ட போலீசார் காயமடைந்ததாகக் கூறப்படுகிறது. வன்முறை சம்பவங்கள் தொடர்பாக 2,500க்கும் மேற்பட்டோர் கைது செய்யப்பட்டதாகவும் தகவல்கள் தெரிவிக்கின்றன.

போராட்டங்கள் தீவிரமடைந்ததைத் தொடர்ந்து, வன்முறையில் ஈடுபடுவோர் மீது கடும் நடவடிக்கை எடுக்கப்படும் என்று பிரான்ஸ் அதிபர் இமானுவேல் மேக்ரான் எச்சரித்துள்ளார். மேலும், அமைதியை மீட்டெடுக்கும் நடவடிக்கையாக பாரிஸில் ஊரடங்கு உத்தரவு அமல்படுத்தப்பட்டதாகவும், பாரிஸ் உள்ளிட்ட முக்கிய நகரங்களின் சில பகுதிகளில் பொதுப் போராட்டங்களுக்குத் தடை விதிக்கப்பட்டதாகவும் தெரிவிக்கப்பட்டுள்ளது.