சென்னை: பிரதமர் Narendra Modi தலைமையின் கீழ் கடந்த பத்தாண்டுகளில் இந்தியாவின் சூரிய மற்றும் காற்றாலை எரிசக்தி திறன் கணிசமாக உயர்ந்துள்ளதாக நடிகர் Kamal Haasan பாராட்டியுள்ளார்.
இதுகுறித்து அவர் வெளியிட்டுள்ள வீடியோவில், ஈரான் போரின் தாக்கத்தால் உலகளவில் எரிசக்தி நெருக்கடி உருவாகி வருவதாக குறிப்பிட்டார். எண்ணெய் விலை உயர்வு, கடல் வர்த்தக பாதைகள் முடக்கம் போன்ற காரணங்களால் சமையல் எரிவாயு, உரங்கள், தொழிற்சாலைகள் மற்றும் வாகனங்களுக்கு தேவையான எரிபொருட்களின் விலை அதிகரித்துள்ளதாக அவர் தெரிவித்தார்.
இந்த சூழ்நிலைக்கு பதிலளிக்கும் வகையில் பல நாடுகள் எரிபொருள் சேமிப்பு நடவடிக்கைகளை மேற்கொண்டு வருவதாகவும், சிங்கப்பூர் பிரதமரும் மக்களை கடினமான காலங்களுக்கு தயாராக இருக்குமாறு கேட்டுக் கொண்டதாகவும் கமல் கூறினார். இந்தியாவிலும் அடுத்த ஒரு ஆண்டுக்குள் எரிசக்தி சேமிப்பை அதிகரிக்க வேண்டும் என பிரதமர் கேட்டுக் கொண்டுள்ளதாக அவர் நினைவுபடுத்தினார்.
தேசிய நலனில் அரசியல் வேறுபாடுகளை தாண்டி ஒன்றுபட வேண்டிய அவசியம் இருப்பதாக கூறிய கமல், முன்னாள் பிரதமர் Atal Bihari Vajpayee கூறிய “அரசுகள் வரும், போகும்; ஆனால் நாடு தொடரும்” என்ற கருத்தையும் மேற்கோள் காட்டினார்.
1962 சீன போரின்போது மக்கள் தங்களது தங்கத்தை நன்கொடையாக வழங்கியதையும், 1965 உணவுத் தட்டுப்பாடு காலத்தில் முன்னாள் பிரதமர் Lal Bahadur Shastri வாரத்தில் ஒரு வேளை உணவை தவிர்க்குமாறு கேட்டுக் கொண்டதையும் அவர் நினைவுகூர்ந்தார்.
தற்போது மக்கள் பெரிய தியாகங்களை செய்ய வேண்டிய அவசியம் இல்லையென்றாலும், சிறிய அளவிலான எரிசக்தி சேமிப்புகள் நாட்டிற்கு பெரும் பலன் தரும் என கமல் தெரிவித்தார். அரசியல் கூட்டணிகளை தாண்டி நல்ல செயல்களை பாராட்ட வேண்டியது அவசியம் என்றும் அவர் கூறினார்.
மேலும், நிலக்கரி எரிவாயு மாற்றம், புதுப்பிக்கத்தக்க மற்றும் அணு எரிசக்தி துறைகளில் மேற்கொள்ளப்படும் முதலீடுகள் நம்பிக்கையளிப்பதாக அவர் குறிப்பிட்டார். அதே நேரத்தில், தியாகம் மக்களிடமிருந்து மட்டும் எதிர்பார்க்கப்படக் கூடாது; அரசுகளும் தங்களது பங்கை நிறைவேற்ற வேண்டும் என்றார்.
இதற்காக பிரதமர் அனைத்து மாநில முதலமைச்சர்களுடனும் தேசிய உச்சி மாநாடு நடத்த வேண்டும் என அவர் கோரிக்கை வைத்தார். மத்திய மற்றும் மாநில அரசுகள் இணைந்து பொதுமக்களை பாதுகாக்க வேண்டும் என்றும் வலியுறுத்தினார்.
பெட்ரோல், டீசலில் உள்ள மாநில வரிகளை குறைப்பதுடன், ரயில், மெட்ரோ மற்றும் பஸ் கட்டணங்களையும் குறைக்க வேண்டும் என அவர் பரிந்துரைத்தார். இதனால் மக்கள் தனியார் வாகனங்களை விட பொதுப் போக்குவரத்தை அதிகமாக பயன்படுத்துவார்கள் என்றார்.
இன்று சேமிக்கப்படும் ஒவ்வொரு அலகு எரிசக்தியும் நாளைய இந்தியாவை வலுப்படுத்தும் என்றும், சேமிக்கப்படும் ஒவ்வொரு துளி எண்ணெயும் ஏழை மக்களை பணவீக்கத்திலிருந்து பாதுகாக்கும் என்றும் கமல் தெரிவித்துள்ளார்.
