Puducherry சட்டசபை தேர்தலில் வெற்றி பெற்ற எம்.எல்.ஏ.க்களின் பதவியேற்பு விழா நடைபெற்றது. விழாவிற்கு பிறகு செய்தியாளர்களை சந்தித்த N. Rangasamy, மாநில அந்தஸ்து குறித்து முக்கிய கருத்துகளை தெரிவித்தார்.
அப்போது அவர் கூறுகையில், “புதுச்சேரி அரசின் நலத்திட்டங்கள் மத்திய அரசின் ஒத்துழைப்புடன் சிறப்பாக செயல்பட்டு வருகின்றன. அமைச்சர் பதவிக்காக ரூ.100 கோடி பேரம் நடைபெறுவதாக முன்னாள் முதல்வர் V. Narayanasamy குற்றம்சாட்டியுள்ளார்.
ஆனால், யார் யாரிடம் பேசினர் என்பதை தெளிவாக தெரிவித்தால் அதுகுறித்து விசாரணை நடத்தலாம்,” என்றார்.
மேலும், “தமிழகத்தில் புதிதாக அமைந்துள்ள அரசுக்கு எனது பாராட்டுகளையும், முதல்வருக்கு வாழ்த்துகளையும் தெரிவித்துக் கொள்கிறேன். புதுச்சேரியில் இருந்து சென்ற ஆனந்திற்கு அமைச்சரவையில் இடம் வழங்கப்பட்டிருப்பது மகிழ்ச்சி அளிக்கிறது,” என்றும் கூறினார்.
புதுச்சேரி விமான நிலைய விரிவாக்கம் குறித்து பேசிய அவர், “தமிழக முதல்வருடன் ஆலோசித்து தமிழகப் பகுதியில் நிலம் பெற்று விமான நிலையத்தை விரிவுபடுத்த நடவடிக்கை எடுக்கப்படும்,” என்றார்.
அத்துடன், “பிரதமர் கூறியபடி புதுச்சேரி அனைத்து துறைகளிலும் வளர்ச்சி அடைந்து வருகிறது. நலத்திட்ட உதவிகளும் சிறப்பாக வழங்கப்பட்டு வருகின்றன.
மாநில அந்தஸ்தை தொடர்ந்து வலியுறுத்தி நிச்சயமாக பெறுவோம். பிரதமரின் ஆதரவு மற்றும் மத்திய அரசின் ஒத்துழைப்புடன் புதுச்சேரிக்கு மாநில அந்தஸ்து கிடைக்கும் என்ற நம்பிக்கை உள்ளது. அந்த நம்பிக்கை கண்டிப்பாக வெற்றி பெறும்,” என்றும் ரங்கசாமி தெரிவித்தார்.
மேலும், தட்டாஞ்சாவடி தொகுதிக்கான இடைத்தேர்தல் அறிவிக்கப்பட்ட பிறகே வேட்பாளர் மற்றும் கட்சி குறித்து தகவல் வெளியாகும் என்றும் அவர் கூறினார்.
