பெரியார் அறிவுலக நூல்களின் தரம் குறித்து சர்ச்சை: பெருமாள் முருகன் கட்டுரையில் சுட்டிக்காட்டிய தகவல்கள்!

கோவை: கோவை பெரியார் அறிவுலகத்தில் இடம்பெற்றுள்ள சில நூல்களின் உள்ளடக்கம் மற்றும் விலை குறித்து எழுத்தாளர் பெருமாள் முருகன் அதிருப்தி தெரிவித்துள்ளார். நூலகத்திற்குச் சென்று பார்வையிட்டபோது தமக்குக் கிடைத்த அனுபவங்களையும், அதிர்ச்சியளித்த தகவல்களையும் ‘சிந்தை’ இணையதளத்தில் வெளியிட்டுள்ள கட்டுரையில் அவர் விவரித்துள்ளார்.

ரூ.1,445 விலையுள்ள நாலடியார் நூல்

பெருமாள் முருகன் தனது கட்டுரையில் குறிப்பிட்டுள்ளதாவது:

நூலகத்தில் இடம்பெற்றுள்ள ‘நாலடியார் வாழ்வின் வழிகாட்டி’ என்ற 300 பக்க நூலின் விலை ரூ.1,445 எனக் குறிப்பிட்டுள்ளார். பொதுவாக மற்ற பதிப்பகங்கள் 300 பக்க நூல்களுக்கு சுமார் ரூ.350 விலை நிர்ணயிப்பதாகவும் ஒப்பிட்டுள்ளார்.

அதிக விலை கொண்ட நூல்களில் அரிய தகவல்களும், ஆழமான ஆய்வுகளும் இடம்பெற்றிருக்கும் என எதிர்பார்த்து அவற்றைப் படித்தபோது ஏமாற்றமடைந்ததாக அவர் தெரிவித்துள்ளார்.

நாலடியார் குறித்த நூலின் உள்ளடக்கத்தில் கேள்வி

‘நாலடியார் வாழ்வின் வழிகாட்டி’ நூலில் நாலடியார் ஒரு கவிஞர் மற்றும் தத்துவ ஞானி எனக் குறிப்பிடப்பட்டிருப்பதைச் சுட்டிக்காட்டியுள்ளார்.

நாலடியார் என்பது பெயர் தெரியாத சமண முனிவர்கள் இயற்றிய நானூறு வெண்பாக்களின் தொகுப்பு எனத் தான் இதுவரை படித்து வந்ததாகவும், அந்த நூலில் இடம்பெற்றுள்ள விளக்கம் தமக்கு வியப்பையும் அதிர்ச்சியையும் ஏற்படுத்தியதாகவும் குறிப்பிட்டுள்ளார்.

சுமார் 15 ஆண்டுகள் தமிழ் இலக்கியக் கல்வியை முறையாகப் பயின்றதுடன், 30 ஆண்டுகள் அக்கல்வியைப் பயிற்றுவித்த அனுபவம் கொண்ட தனக்கே இந்த விளக்கம் புதிதாக இருப்பதாக அவர் தெரிவித்துள்ளார்.

‘தமிழ்நாடு ஒரு பார்வை’ நூலில் வரலாற்றுப் பிழைகள்?

தனலட்சுமி அர்ஜுன் எழுதிய ‘தமிழ்நாடு ஒரு பார்வை’ என்ற நூலில் இடம்பெற்றுள்ள சில தகவல்களையும் பெருமாள் முருகன் தனது கட்டுரையில் எடுத்துக்காட்டியுள்ளார்.

அந்த நூலின் 108வது பக்கத்தில், தமிழகத்தின் முதல் முதலமைச்சர் மற்றும் அடுத்தடுத்த அரசியல் தலைவர்கள் குறித்துப் பல்வேறு பெயர்கள் மற்றும் தகவல்கள் இடம்பெற்றுள்ளதாகக் குறிப்பிட்டுள்ளார். அவற்றில் உள்ள தகவல்களின் துல்லியம் குறித்தும் அவர் கேள்வி எழுப்பியுள்ளார்.

பிற பதிப்பக நூல்கள் குறித்தும் கேள்வி

அகல்விளக்கு பதிப்பகத்தைச் சேர்ந்த நூல்களைப் போலவே, பீனிக்ஸ் பதிப்பகம் வெளியிட்ட நூற்றுக்கும் மேற்பட்ட புத்தகங்களும் நூலக அலமாரிகளில் இடம்பெற்றுள்ளதாக அவர் தெரிவித்துள்ளார்.

மேலும், இன்னும் பிரித்து அடுக்கப்படாத நூற்றுக்கணக்கான புத்தகப் பெட்டிகள் இருப்பதாகக் குறிப்பிட்டுள்ள அவர், அவற்றில் இடம்பெற்றுள்ள நூல்களின் உள்ளடக்கம் மற்றும் ஆங்கில நூல்களின் தரம் குறித்தும் கேள்வி எழுப்பியுள்ளார்.

இவ்வாறு பெரியார் அறிவுலகத்தில் பார்வையிட்ட நூல்களின் விலை, உள்ளடக்கம் மற்றும் தரம் தொடர்பான தனது அதிருப்தியையும் கேள்விகளையும் எழுத்தாளர் பெருமாள் முருகன் கட்டுரையில் வெளிப்படுத்தியுள்ளார்.