சென்னை: அரசு வேலை வாங்கித் தருவதாக கூறி பணமோசடி செய்ததாக தொடரப்பட்ட வழக்கில் முன்னாள் அமைச்சர் Senthil Balaji-யிடம் விசாரணை நடத்த அனுமதி கோரி அமலாக்கத்துறை தமிழக அரசுக்கு கடிதம் எழுதியுள்ளது.
கடந்த 2011 முதல் 2016 வரை அதிமுக ஆட்சிக் காலத்தில் அமைச்சராக இருந்த செந்தில் பாலாஜி, அரசு வேலை வாங்கித் தருவதாக பலரிடம் பணம் பெற்றதாக குற்றச்சாட்டுகள் எழுந்தன. இதுதொடர்பாக பல்வேறு புகார்கள் பதிவு செய்யப்பட்டதுடன், நீதிமன்றங்களிலும் வழக்குகள் நிலுவையில் உள்ளன.
இதனிடையே, சட்டவிரோத பணப்பரிமாற்றத் தடைச் சட்டத்தின் கீழ் அமலாக்கத்துறையும் தனியாக வழக்குப்பதிவு செய்து விசாரணை நடத்தி வருகிறது. இந்த வழக்கில் செந்தில் பாலாஜியின் சகோதரர் அசோக் குமார் உள்ளிட்ட சிலரின் பெயர்களும் இடம்பெற்றுள்ளதாக கூறப்படுகிறது.
இந்த வழக்கின் தொடர்பாக கடந்த 2023ஆம் ஆண்டு செந்தில் பாலாஜி கைது செய்யப்பட்டார். பின்னர் பல மாதங்களுக்குப் பிறகு அவர் ஜாமினில் வெளியே வந்தார்.
திமுக ஆட்சிக் காலத்தில் அமைச்சராக இருந்ததால், அவருக்கு எதிரான வழக்கில் தொடர்ந்து நடவடிக்கை எடுக்க தமிழக அரசின் அனுமதி தேவைப்படுவதாக கூறப்படுகிறது. இதற்காக அமலாக்கத்துறை முன்பும் கடிதம் அனுப்பியிருந்ததாகவும், ஆனால் அனுமதி வழங்கப்படவில்லை என்றும் தகவல்கள் தெரிவிக்கின்றன.
இந்நிலையில், தற்போது தமிழகத்தில் தவெக தலைமையிலான அரசு அமைந்துள்ள சூழலில், செந்தில் பாலாஜியிடம் விசாரணை நடத்த அனுமதி கோரி அமலாக்கத்துறை மீண்டும் தமிழக அரசுக்கு அதிகாரப்பூர்வமாக கடிதம் அனுப்பியுள்ளது.
மேலும், இந்த வழக்குடன் தொடர்புடைய ஆதாரங்கள், ரகசிய தகவல்கள் மற்றும் புகார் ஆவணங்கள் உள்ளிட்டவை தமிழக தலைமைச் செயலருக்கு அனுப்பி வைக்கப்பட்டுள்ளதாகவும் தகவல்கள் வெளியாகியுள்ளன.
