இந்தியா மற்றும் நியூசிலாந்து அணிகள் மோதிய ஐந்து போட்டிகள் கொண்ட டி20 தொடரின் நான்காவது ஆட்டம் விசாகப்பட்டினம் ராஜசேகர ரெட்டி மைதானத்தில் நடைபெற்றது. முதல் மூன்று போட்டிகளில் வெற்றி பெற்று தொடரை கைப்பற்றியிருந்த இந்தியா, இந்த ஆட்டத்தில் 50 ரன் வித்தியாசத்தில் தோல்வியடைந்தது.
டாஸ் வென்ற இந்திய கேப்டன் சூர்யகுமார் பீல்டிங்கை தேர்வு செய்தார். இந்திய அணியில் இஷான் கிஷானுக்கு ஓய்வு அளிக்கப்பட்டு அர்ஷ்தீப் சிங் சேர்க்கப்பட்டார். நியூசிலாந்து அணியில் ஜேமிசன் இடத்தில் பால்க்ஸ் களமிறங்கினார்.
வெடித்த தொடக்கம்
நியூசிலாந்து துவக்க வீரர்கள் கான்வே – செய்பெர்ட் ஜோடி தொடக்கமே இந்திய பந்துவீச்சை சிதறடித்தது. அர்ஷ்தீப் வீசிய முதல் ஓவரிலேயே செய்பெர்ட் தொடர்ந்து பவுண்டரிகளை விளாசினார். ஹர்ஷித் ராணா, பிஷ்னோய் ஓவர்களிலும் சிக்சர்-பவுண்டரிகள் மழைபோல் வந்தது. செய்பெர்ட் 25 பந்தில் அரைசதம் அடிக்க, 8.1 ஓவரில் ஸ்கோர் 100ஐ கடந்தது.
வேகத்தில் சரிவு
குல்தீப் சுழலில் கான்வே (44) வெளியேற, பும்ரா ரச்சின் ரவிந்திராவை குறைந்த ஸ்கோரில் வீழ்த்தினார். செய்பெர்ட் (62) மற்றும் பிலிப்ஸ் (24) ஆகியோரின் கேட்ச்களை ரிங்கு சிங் சிறப்பாக பிடித்தார். சான்ட்னர் ரன்-அவுட் ஆக, தொடக்க 100 ரன்களுக்கு பிறகு நியூசிலாந்து வேகமாக விக்கெட்டுகளை இழந்தது. இறுதியில் மிட்செல் அதிரடி ஆட்டத்தால் 20 ஓவரில் நியூசிலாந்து 215/7 ரன் எடுத்தது.
அதிர்ச்சி தொடக்கம்
215 ரன் இலக்கை துரத்திய இந்திய அணிக்கு அபிஷேக் சர்மா முதல் பந்திலேயே ‘டக்’ அவுட்டாகி அதிர்ச்சி அளித்தார். சூர்யகுமார், ஹர்திக் பாண்ட்யா, சஞ்சு சாம்சன் ஆகியோர் விரைவில் வெளியேற, 10 ஓவரில் இந்தியா 77/4 என தடுமாறியது.
துபே ஒரே நம்பிக்கை
இந்த நிலையில் ஷிவம் துபே அதிரடியாக விளையாடினார். இஷ் சோதி ஓவரில் 29 ரன் குவித்து, 15 பந்தில் அரைசதம் கடந்தார். ஆனால் மற்ற பேட்டர்கள் நிலைக்காததால், துபே 61 ரன்னில் வெளியேறியதும் தோல்வி உறுதியானது. இந்திய அணி 18.4 ஓவரில் 165 ரன்னுக்கு ஆல்-அவுட்டானது.
சாதனை குறிப்புகள்
இந்த போட்டியில் ஷிவம் துபே 15 பந்தில் அரைசதம் அடித்து, சர்வதேச டி20ல் இந்தியாவின் 3வது அதிவேக அரைசத வீரராக இடம்பிடித்தார். ரிங்கு சிங் 4 கேட்ச் பிடித்து சாதனை சமநிலையை ஏற்படுத்தினார். மேலும், இந்தியாவுக்கு எதிராக நியூசிலாந்து தொடக்க ஜோடி முதல் விக்கெட்டுக்கு 100 ரன் சேர்த்தது 2022க்கு பின் முதல் முறையாக அமைந்தது.
