மஸ்கட்:
கடந்த 11 ஆண்டுகளில் இந்தியாவில் மேற்கொள்ளப்பட்ட சீர்திருத்தங்கள், நாட்டின் பொருளாதார அடிப்படையையே மாற்றியமைத்துள்ளன என்று பிரதமர் நரேந்திர மோடி தெரிவித்துள்ளார்.
ஓமன் நாட்டுக்கு சென்றுள்ள பிரதமர் மோடி, மஸ்கட் நகரில் நடைபெற்ற இந்தியா – ஓமன் பொருளாதார ஒத்துழைப்பு அமைப்பு மாநாட்டில் உரையாற்றினார். அப்போது அவர் கூறியதாவது:
கடந்த 11 ஆண்டுகளில் இந்தியா கொள்கை மாற்றங்களில் மட்டும் நின்றுவிடாமல், பொருளாதாரத்தின் “டிஎன்ஏ”வையே மாற்றியுள்ளது. ஜிஎஸ்டி அறிமுகம் மூலம், இந்தியா முழுவதும் ஒரே சந்தையாக ஒருங்கிணைக்கப்பட்டதுடன், முதலீட்டாளர்களின் நம்பிக்கையும் வலுப்பெற்றுள்ளது.
இந்தியா – ஓமன் உறவுகள் நம்பிக்கையின் அடிப்படையில் உருவாகி, நட்பின் வலிமையால் தொடர்ந்து வளர்ந்து வந்துள்ளன. இரு நாடுகளுக்கும் இடையிலான தூதரக உறவுகள் 70 ஆண்டுகளை கடந்துள்ள நிலையில், இது ஒரு கொண்டாட்டம் மட்டுமல்ல; பல நூற்றாண்டுகளாக நீடித்துவரும் பாரம்பரியத்தை எதிர்காலத்தை நோக்கி நகர்த்தும் முக்கிய கட்டமாகும் என அவர் குறிப்பிட்டார்.
புலம்பெயர் இந்தியர்களிடம் உரை
இதனைத் தொடர்ந்து, பிரதமர் மோடி ஓமனில் வசிக்கும் இந்திய வம்சாவளியினரிடம் உரையாற்றினார். அவர் பேசத் தொடங்குவதற்கு முன், அங்கு கூடியிருந்தோர் “பாரத் மாதா கி ஜெய்”, “வந்தே மாதரம்”, “மோடி, மோடி” என முழக்கமிட்டனர்.
பின்னர் மோடி பேசுகையில், இந்திய புலம்பெயர் சமூகம் ஒற்றுமையும், ஒத்துழைப்பும் கொண்ட வாழும் எடுத்துக்காட்டாக திகழ்கிறது என்றார். அனைவரும் ஒரே குடும்பமாக ஒன்று சேர்ந்துள்ளோம் என்றும், ஒரே நாடு – ஒரே அணி இந்தியா என்ற உணர்வுடன் நாம் கொண்டாடுகிறோம் என்றும் கூறினார்.
வேற்றுமையில் ஒற்றுமை என்பதே இந்திய கலாசாரத்தின் வலிமையான அடையாளம். ஒவ்வொரு நாளும் புதிய அனுபவங்களைத் தருகிறது; ஒவ்வொரு பருவமும் ஒரு திருவிழாவாக மாறுகிறது. இதன் காரணமாக, இந்தியர்கள் உலகின் எங்கிருந்தாலும் பன்முகத்தன்மையை மதித்து வாழ்கிறார்கள் என பிரதமர் தெரிவித்தார்.
சமீபத்தில் தீபாவளி பண்டிகை யுனெஸ்கோவின் கலாசார பாரம்பரிய பட்டியலில் சேர்க்கப்பட்டதை குறிப்பிட்ட அவர், தீபாவளி தீபம் இன்று இந்தியாவை மட்டும் அல்ல, உலகம் முழுவதையும் ஒளிரச் செய்கிறது என்று கூறினார். இது உலகெங்கிலும் உள்ள இந்தியர்களுக்கு பெருமை தரும் விஷயம் என்றும் தெரிவித்தார்.
இந்தியா மற்றும் ஓமன் இடையிலான உறவுகள் வரலாற்று ரீதியாகவும் நெருக்கமானவை. இந்தியப் பெருங்கடலின் பருவக்காற்றுகள் இரு நாடுகளுக்கிடையிலான வர்த்தகத்திற்கு வழிகாட்டியுள்ளன. லோதல், மாண்டவி, தாம்ரலிப்டி போன்ற துறைமுகங்களில் இருந்து இந்திய முன்னோர்கள் மரப்படகுகள் மூலம் மஸ்கட், சுர், சாலாஹ் போன்ற ஓமன் நகரங்களுக்கு சென்ற வரலாறு இருப்பதாக அவர் நினைவூட்டினார்.
மாண்டவி முதல் மஸ்கட் வரை நீடித்த இந்த வரலாற்று தொடர்புகளை இந்திய தூதரகம் ஒரு நூலாக தொகுத்துள்ளதற்கு மகிழ்ச்சி தெரிவித்தார்.
