கொழும்பு:
தெற்காசிய நாடுகளில் நீடித்து வரும் அரசியல் குழப்பங்களுக்கும், வன்முறைகளுக்கும் முடிவுகட்ட இந்தியாவின் பங்கு மிக முக்கியமானது என இலங்கை எம்.பி. நமல் ராஜபக்சே தெரிவித்துள்ளார்.
கடந்த சில ஆண்டுகளில் வங்கதேசம், நேபாளம், இலங்கை உள்ளிட்ட நாடுகளில் அரசியல் நிலைதடுமாற்றம், மக்கள் போராட்டங்கள் மற்றும் ஆட்சி மாற்றங்கள் தொடர்ச்சியாக நடந்துள்ளன. இதை சுட்டிக்காட்டி, முன்னாள் இலங்கை அதிபர் **மகிந்த ராஜபக்சே**யின் மகனும், நாடாளுமன்ற உறுப்பினருமான நமல் ராஜபக்சே சமூக வலைதளத்தில் விரிவான அறிக்கையை வெளியிட்டுள்ளார்.
அந்த அறிக்கையில் அவர் கூறியதாவது:
பயங்கரவாதம், அரசியல் வன்முறை, பொது அமைதியின்மை போன்ற காரணங்களால் தெற்காசியாவில் வலுவான பிராந்திய ஒத்துழைப்பு அவசர தேவையாக உள்ளது. பயங்கரவாதத்தை எதிர்த்தல், அரசியல் வன்முறைகளைத் தடுக்கல் மற்றும் சிறுபான்மையினர் உரிமைகளைப் பாதுகாத்தல் ஆகியவை தெற்காசிய நாடுகள் இணைந்து மேற்கொள்ள வேண்டிய பொறுப்புகள்.
இந்த இலக்குகளை அடைய தெற்காசிய நாடுகளுக்கிடையே அதிக ஒருங்கிணைப்பு தேவைப்படுகிறது. இதில் இந்தியாவின் தலைமைத்துவம் தவிர்க்க முடியாதது. இந்தியா முனைப்புடன் செயல்பட்டால் மட்டுமே தெற்காசியாவில் அமைதி, ஒற்றுமை மற்றும் நிலையான வளர்ச்சி ஏற்படும் என அவர் குறிப்பிட்டுள்ளார்.
நமல் ராஜபக்சேயின் இந்த கருத்துகள், இந்தியா – இலங்கை உறவுகள் சமீப காலங்களில் வலுவடைந்து வரும் சூழலில் வெளியாகியுள்ளது. 2022ம் ஆண்டு இலங்கை கடும் பொருளாதார நெருக்கடியை சந்தித்த போது, இந்தியா நிதி உதவி மற்றும் கடன் வசதிகளை வழங்கியது. அதேபோல், கடந்த ஆண்டு ஏற்பட்ட டிட்வா புயல் பாதிப்பின்போதும் இந்தியா இலங்கைக்கு முக்கியமான உதவிகளை செய்தது குறிப்பிடத்தக்கது.
