சென்னை:
அதிகார திமிருடன் நடந்தால் தோழமை கட்சிகள் அமைதியாக இருக்கும் காலம் முடிவடைந்துவிட்டதாக காங்கிரஸ் எம்.பி. மாணிக்கம் தாகூர் தெரிவித்துள்ளார்.
தமிழக அரசியலில் ஆட்சியில் பங்கு, அதிகாரப் பங்கீடு தொடர்பாக திமுகவை தொடர்ந்து விமர்சித்து வரும் மாணிக்கம் தாகூர், கூட்டணி அரசியல் என்பது சமநிலையும் மரியாதையும் கொண்டதாக இருக்க வேண்டும் என்று வலியுறுத்தி வருகிறார். தனித்து எந்த கட்சியும் ஆட்சி அமைக்க முடியாத சூழலில், கூட்டணி கட்சிகளின் குரலை புறக்கணிக்க முடியாது என்றும் அவர் கூறி வருகிறார்.
மீண்டும் திமுகவை சீண்டிய பதிவு
இந்த நிலையில், தனது எக்ஸ் சமூக வலைதளப் பக்கத்தில் புதிய பதிவொன்றை வெளியிட்டுள்ள அவர், இந்த முறை மதுரை வடக்கு தொகுதியில் காங்கிரஸ் வேட்பாளர் நிறுத்தப்பட வேண்டும் என்ற கோரிக்கையை காங்கிரஸ் தலைவர் **மல்லிகார்ஜுன கார்கே**விடம் வைப்பேன் என குறிப்பிட்டுள்ளார்.
அதிகார திமிருக்கு எச்சரிக்கை
அந்த பதிவில், “தன்மானத்தை காக்க சிலருக்கு பாடம் புகட்ட வேண்டிய கட்டாயம் ஏற்பட்டுள்ளது. அதிகார திமிருடன் நடந்தால் தோழமை கட்சிகள் அமைதியாக இருப்பார்கள் என்ற எண்ணம் இனி செல்லாது” என அவர் கடுமையாக தெரிவித்துள்ளார்.
திமுக பேச்சுக்கு பதிலடி
மேலும், “நாங்கள் இல்லையென்றால் இண்டி கூட்டணியே இல்லை” என்று மதுரை திமுக மாநகர் மாவட்ட செயலாளர் கோ. தளபதி, திமுக மாணவர் அணி ஏற்பாடு செய்த பொதுக்கூட்டத்தில் பேசியதைக் குறிப்பிட்டு, அதற்கு மறைமுக பதிலடியாக இந்த பதிவை மாணிக்கம் தாகூர் வெளியிட்டுள்ளார்.
இந்த பதிவால், திமுக–காங்கிரஸ் கூட்டணிக்குள் நிலவும் உள்ளக அதிருப்தி மீண்டும் வெளிப்படையாகியுள்ளது.
