அறநிலையத்துறை லோகோவாக ஸ்ரீவில்லிபுத்தூர் கோபுரத்தை மீண்டும் அமைக்க வேண்டும்: ஹிந்து அமைப்புகள் கோரிக்கை

சென்னை: ஹிந்து சமய அறநிலையத்துறையின் சின்னமாக ஸ்ரீவில்லிபுத்தூர் கோவில் கோபுரத்தை மீண்டும் அமைக்க வேண்டும் உள்ளிட்ட கோரிக்கைகளை வலியுறுத்தி, பாரத் ஹிந்து முன்னணி சார்பில் சென்னையில் ஆர்ப்பாட்டம் நடைபெற்றது.

திருப்பரங்குன்றம் மலை மீது தீபம் ஏற்ற வேண்டும் என்ற கோரிக்கையை முன்வைத்து, சென்னை எழும்பூரில் நேற்று இந்த ஆர்ப்பாட்டம் நடைபெற்றது.

மேலும், அதிமுக ஆட்சியில் விநாயகர் சதுர்த்தி விழா தொடர்பாகக் கொண்டுவரப்பட்ட அரசாணை எண் 598-ஐ நீக்க வேண்டும் என்றும், திமுக ஆட்சியில் மாற்றப்பட்ட ஸ்ரீவில்லிபுத்தூர் கோபுரச் சின்னத்தை மீண்டும் ஹிந்து சமய அறநிலையத்துறையின் சின்னமாக அமைக்க வேண்டும் என்றும் ஆர்ப்பாட்டத்தில் வலியுறுத்தப்பட்டது.

இதில் பேசிய பாரத் ஹிந்து முன்னணித் தலைவர் பிரபு, திருப்பரங்குன்றத்தில் தீபம் ஏற்ற சென்னை உயர் நீதிமன்ற மதுரை கிளை உத்தரவிட்டதாகவும், அந்த உத்தரவை திமுக அரசு செயல்படுத்தத் தடை விதித்ததாகவும் குற்றம்சாட்டினார். தற்போதைய முதல்வர் விஜய்க்கு ஹிந்துக்கள் மீது அக்கறை இருந்தால், நீதிமன்ற உத்தரவை அமல்படுத்த வேண்டும் என்றும் அவர் வலியுறுத்தினார்.

ஆர்ப்பாட்டத்தில் ஹிந்து தமிழர் கட்சித் தலைவர் ராம ரவிக்குமார் பேசியதாவது:

வாக்கு வங்கி அரசியலுக்காகப் பெரும்பான்மை மக்களின் மத உணர்வுகளை திமுக அரசு நசுக்கியதாகக் குற்றம்சாட்டிய அவர், அதே தவறை தவெக அரசு செய்யக்கூடாது என்றார். திருப்பரங்குன்றம் ஆன்மிக ரீதியாக வளர்ச்சி பெறுவதற்கு அங்கு தீபம் ஏற்றுவது அவசியம் என்றும் தெரிவித்தார்.

ஹிந்து சமய அறநிலையத்துறையின் லோகோவில் உள்ள மசூதி மினாரை ஒத்த சின்னத்தை அகற்றி, கோவில் கோபுரத்தைச் சின்னமாக அமைக்க வேண்டும் என்றும் கோரிக்கை விடுத்தார்.

மேலும், மசூதிகள் அமைந்துள்ள பகுதிகளைக் காரணம் காட்டி விநாயகர் சதுர்த்தி ஊர்வலங்களுக்குத் தடை விதிக்கும் உத்தரவுகளை ரத்து செய்ய வேண்டும் என்றும் வலியுறுத்தினார். இதுதொடர்பாக வழக்குத் தொடர்ந்து விநாயகர் சதுர்த்தி ஊர்வலத்தை நடத்துவோம் என்றும் கூறினார்.

பொது இடங்களில் இறை மறுப்பு வாசகங்களுடன் உள்ள ஈ.வெ.ரா. சிலைகளை அகற்ற நீதிமன்றம் வாயிலாக சட்ட நடவடிக்கை மேற்கொள்ளப்படும் என்றும் அவர் தெரிவித்தார்.