புதுடில்லி: உபா சட்டத்தின் கீழ் கைது செய்யப்பட்டவர்களுக்கும் “பிணையே விதி; சிறை விதிவிலக்கு” என்ற கொள்கை பொருந்தும் என்று உச்சநீதிமன்றம் முக்கிய கருத்து தெரிவித்துள்ளது.
ஜம்மு – காஷ்மீரில் போதைப்பொருள் கடத்தல் மற்றும் பயங்கரவாதத்திற்கு நிதியுதவி செய்ததாக குற்றம்சாட்டப்பட்டு, 2020 ஆம் ஆண்டு உபா சட்டத்தின் கீழ் கைது செய்யப்பட்ட சையத் இஃப்திகார் அன்ட்ராஃப் என்பவர் ஜாமீன் கோரி உச்சநீதிமன்றத்தில் மனு தாக்கல் செய்திருந்தார்.
இந்த வழக்கை நீதிபதிகள் பி.வி. நாகரத்னா மற்றும் உஜ்ஜல் புயான் ஆகியோர் அடங்கிய அமர்வு விசாரித்தது.
விசாரணையின் போது, உபா சட்டத்தின் 43டி(5) பிரிவின் பெயரில் ஒருவரை காலவரையறையின்றி சிறையில் அடைத்து வைப்பதை நியாயப்படுத்த முடியாது என்று நீதிபதிகள் தெரிவித்தனர்.
மேலும், இந்திய அரசியலமைப்புச் சட்டத்தின் 21 மற்றும் 22வது பிரிவுகளின் அடிப்படை உரிமைகள் மதிக்கப்பட வேண்டும் என்றும் கூறினர்.
இதையடுத்து, சையத் இஃப்திகாருக்கு ஜாமீன் வழங்க உச்சநீதிமன்றம் உத்தரவிட்டது.
ஒரு வாரத்திற்குள் அவரை என்ஐஏ நீதிமன்றத்தில் ஆஜர்படுத்தி விடுவிக்கவும், அவரது கடவுச்சீட்டை திருப்பி வழங்கவும் நீதிமன்றம் உத்தரவிட்டுள்ளது.
மேலும், 15 நாட்களுக்கு ஒருமுறை உள்ளூர் காவல் நிலையத்தில் ஆஜராகி கையொப்பமிட வேண்டும் என்ற நிபந்தனையும் விதிக்கப்பட்டுள்ளது.
உமர் காலித் வழக்கு குறித்த விமர்சனம்
இந்த வழக்கு விசாரணையின்போது, தில்லி கலவர வழக்கில் உமர் காலித் மற்றும் ஷர்ஜீல் இமாம் ஆகியோருக்கு ஜாமீன் வழங்க மறுத்த உச்சநீதிமன்ற அமர்வு குறித்தும் நீதிபதிகள் கருத்து தெரிவித்தனர்.
குல்ஃபிஷா ஃபாத்திமா வழக்கில் வழங்கப்பட்ட தீர்ப்பை மேற்கோள் காட்டிய நீதிபதிகள், விசாரணை தாமதம் ஜாமீன் வழங்குவதற்கான முக்கிய காரணமாக கருதப்பட வேண்டும் என்ற கே.ஏ. நஜீப் வழக்கின் தீர்ப்பை முறையாக பின்பற்றவில்லை என சுட்டிக்காட்டினர்.
மேலும், மூன்று நீதிபதிகள் அமர்வு வழங்கிய தீர்ப்புகளை கீழமை நீதிமன்றங்கள் அல்லது குறைந்த அமர்வுகள் புறக்கணிக்க முடியாது என்றும் தெரிவித்தனர்.
“பிணையே விதி; சிறையே விதிவிலக்கு” என்பது அரசியலமைப்பின் அடிப்படை கோட்பாடு என்றும், உபா சட்ட வழக்குகளிலும் அதே கொள்கை பொருந்தும் என்றும் நீதிபதிகள் வலியுறுத்தினர்.
அதேநேரத்தில், குறிப்பிட்ட சில தீவிர வழக்குகளில் ஜாமீன் மறுக்கப்படலாம் என்றும் அவர்கள் தெரிவித்தனர்.
புள்ளிவிவரங்களையும் சுட்டிக்காட்டிய நீதிமன்றம்
உபா சட்டத்தின் கீழ் கைது செய்யப்படுபவர்களில் நாடு முழுவதும் வெறும் 2 முதல் 6 சதவிகிதம் பேர் மட்டுமே தண்டனை பெறுகின்றனர் என்றும், 94 முதல் 98 சதவிகிதம் பேர் வழக்குகளில் இருந்து விடுவிக்கப்படுகின்றனர் என்றும் நீதிமன்றம் குறிப்பிட்டது.
ஜம்மு – காஷ்மீரில் இந்த சட்டத்தின் கீழ் தண்டனை பெறும் விகிதம் ஒரு சதவிகிதத்திற்கும் குறைவாக இருப்பதாகவும் நீதிமன்றம் தெரிவித்தது.
