இந்தியா மற்றும் ஐரோப்பிய யூனியன் இடையே நீண்ட காலமாக நிலுவையில் இருந்த தடையற்ற வர்த்தக ஒப்பந்தம் கையெழுத்தாகியுள்ளது. இந்த ஒப்பந்தம் 2027ஆம் ஆண்டில் இருந்து நடைமுறைக்கு வரும் என அதிகாரப்பூர்வமாக அறிவிக்கப்பட்டுள்ளது. இதனை, “அனைத்து ஒப்பந்தங்களின் தாய்” என ஐரோப்பிய யூனியன் தலைவர் உர்சுலா வான் டெர் லேயன் வர்ணித்துள்ளார்.
இந்தியா–ஐரோப்பிய யூனியன் இடையேயான தடையற்ற வர்த்தக ஒப்பந்தம் குறித்த பேச்சுவார்த்தைகள் 2007ஆம் ஆண்டு தொடங்கி, 2013 வரை பல கட்டங்களாக நடைபெற்றன. ஆனால், கார் மற்றும் மதுபானங்களின் இறக்குமதி வரி, இந்திய ஐ.டி. நிறுவனங்களுக்கான தரவு பாதுகாப்பு, அறிவுசார் சொத்துரிமை மற்றும் தொழிலாளர் விதிகள் போன்ற முக்கிய விவகாரங்களில் ஏற்பட்ட கருத்து வேறுபாடுகள் காரணமாக பேச்சுகள் நிறுத்தப்பட்டன. பின்னர், 2022 ஜூன் மாதத்தில் அதிகாரப்பூர்வ பேச்சுவார்த்தை மீண்டும் தொடங்கப்பட்டு, தற்போது ஒப்பந்தமாக முடிவடைந்துள்ளது.
பிரதமருடன் உயர்மட்ட ஆலோசனை
குடியரசு தின விழாவில் பங்கேற்க சிறப்பு விருந்தினர்களாக இந்தியா வந்துள்ள உர்சுலா வான் டெர் லேயன் மற்றும் ஐரோப்பிய கவுன்சில் தலைவர் ஆன்டோனியோ கோஸ்டா ஆகியோர், டில்லியில் உள்ள ஹைதராபாத் இல்லத்தில் பிரதமர் நரேந்திர மோடியை சந்தித்து பேச்சுவார்த்தை நடத்தினர். இந்த சந்திப்பில், தடையற்ற வர்த்தக ஒப்பந்தத்தின் இறுதி அம்சங்கள் குறித்து விரிவாக ஆலோசிக்கப்பட்டது.
அதிகாரப்பூர்வ அறிவிப்பு
இந்த ஆலோசனைகளுக்குப் பிறகு, இந்தியா–ஐரோப்பிய யூனியன் இடையே தடையற்ற வர்த்தக ஒப்பந்தம் அதிகாரப்பூர்வமாக கையெழுத்தானது. இந்த ஒப்பந்தத்தின் மூலம், பெரும்பாலான பொருட்களுக்கு இருதரப்பும் பரஸ்பரமாக இறக்குமதி வரிகளை நீக்க ஒப்புக் கொண்டுள்ளன. 2027 முதல் இந்த ஒப்பந்தம் நடைமுறைக்கு வரும் என அறிவிக்கப்பட்டுள்ளது.
ஐரோப்பிய தலைவர் கருத்து
இந்த ஒப்பந்தம் குறித்து சமூக வலைதளத்தில் கருத்து தெரிவித்த உர்சுலா வான் டெர் லேயன், “ஐரோப்பாவும் இந்தியாவும் இன்று வரலாறு படைக்கின்றன. அனைத்து வர்த்தக ஒப்பந்தங்களின் தாய் என அழைக்கப்படும் இந்த ஒப்பந்தத்தை நாங்கள் நிறைவு செய்துள்ளோம். இரு தரப்புக்கும் இது பயனளிக்கும். இது ஒரு தொடக்கம் மட்டுமே; எங்கள் உறவை இன்னும் வலுப்படுத்துவோம்” என குறிப்பிட்டுள்ளார்.
ஐரோப்பிய யூனியன் அமைப்பு
ஐரோப்பிய யூனியன் என்பது 27 உறுப்பு நாடுகளை கொண்ட கூட்டமைப்பாகும். இதில் ஆஸ்திரியா, பெல்ஜியம், பல்கேரியா, குரோஷியா, சைப்ரஸ், செக் குடியரசு, டென்மார்க், எஸ்டோனியா, பின்லாந்து, பிரான்ஸ், ஜெர்மனி, கிரீஸ், ஹங்கேரி, அயர்லாந்து, இத்தாலி, லாட்வியா, லிதுவேனியா, லக்சம்பர்க், மால்டா, நெதர்லாந்து, போலந்து, போர்ச்சுகல், ருமேனியா, ஸ்லோவாக்கியா, ஸ்லோவேனியா, ஸ்பெயின் மற்றும் ஸ்வீடன் ஆகிய நாடுகள் இடம்பெற்றுள்ளன.
