நியூயார்க்: வெனிசுலா மீது அமெரிக்கா மேற்கொண்ட ராணுவ தாக்குதலுக்கு ரஷ்யா, ஈரான் உள்ளிட்ட பல நாடுகள் கடும் கண்டனம் தெரிவித்துள்ளன.
போதைப்பொருள் பயங்கரவாதத்தை வெனிசுலா அரசு ஊக்குவிப்பதாக அமெரிக்கா நீண்ட காலமாக குற்றஞ்சாட்டி வருகிறது. இதற்கு காரணமான அதிபர் நிக்கோலஸ் மதுரோ உள்ளிட்டோர் மீது நடவடிக்கை எடுக்கப்படும் என அமெரிக்க அதிபர் டொனால்ட் டிரம்ப் தொடர்ந்து கூறி வந்தார். இந்த நிலையில், இன்று அதிகாலை வெனிசுலா தலைநகர் கராகஸ், மிரண்டா, அராகுவா உள்ளிட்ட பகுதிகளில் அமெரிக்க படைகள் வான்வழித் தாக்குதலை நடத்தியன.
அமெரிக்க படையினர், அதிபர் நிக்கோலஸ் மதுரோ மற்றும் அவரது மனைவியை சிறைப்பிடித்து, அவர்களை நாட்டை விட்டு வெளியேற்றியதாகவும், தற்போது தங்கள் கட்டுப்பாட்டில் வைத்திருப்பதாகவும் அமெரிக்கா அறிவித்துள்ளது. மதுரோ வெளியேற்றப்பட்ட பின்னரும், வெனிசுலா மீதான தாக்குதலை அமெரிக்க ராணுவம் நிறுத்தவில்லை என கூறப்படுகிறது.
ராணுவ தளங்களை குறிவைத்து அமெரிக்க விமானப்படை தொடர்ந்து குண்டுவீசி தாக்குதல் நடத்தி வரும் நிலையில், இதை எதிர்கொள்ளும் வகையில் வெனிசுலா அரசு அவசர நிலையை பிரகடனப்படுத்தியுள்ளது. இதனிடையே, வெனிசுலா மீது அமெரிக்கா நடத்திய தாக்குதலுக்கு ரஷ்யா மற்றும் ஈரான் உள்ளிட்ட உலக நாடுகள் கடும் கண்டனம் தெரிவித்துள்ளன.
இதுகுறித்து ரஷ்யா வெளியிட்ட அறிக்கையில், கடந்த சில நாட்களாக வெனிசுலாவுக்கு எதிராக எடுக்கப்பட்ட நடவடிக்கைகள் போலவே, இன்றைய தாக்குதலுக்கும் எந்தவொரு உறுதியான காரணமும் இல்லை என தெரிவித்துள்ளது. இது சர்வதேச சட்டத்தை மீறும் செயல் என்றும், அமெரிக்காவுக்கு வெனிசுலா எந்தவொரு அச்சுறுத்தலையும் ஏற்படுத்தவில்லை என்றும் ரஷ்யா கூறியுள்ளது. மேலும், இந்த தாக்குதல் மேலும் விரிவடையக் கூடாது எனவும் வலியுறுத்தியுள்ளது.
ஈரான் வெளியுறவுத்துறை அமைச்சகம் வெளியிட்ட அறிக்கையில், வெனிசுலா மீது அமெரிக்கா நடத்திய தாக்குதல், ஐநா அடிப்படைக் கோட்பாடுகளையும் சர்வதேச சட்டத்தின் அடிப்படை விதிகளையும் மீறும் செயல் என குறிப்பிடப்பட்டுள்ளது. வெனிசுலா நாட்டின் இறையாண்மை மற்றும் பிராந்திய ஒருமைப்பாட்டை மீறும் இந்த நடவடிக்கையை வன்மையாகக் கண்டிப்பதாகவும், சர்வதேச பாதுகாப்பை வலியுறுத்தும் அனைத்து நாடுகளும் அமெரிக்க தாக்குதலுக்கு கண்டனம் தெரிவிக்க வேண்டும் எனவும் ஈரான் தெரிவித்துள்ளது.
இதேபோல், கியூபா, ஸ்பெயின் உள்ளிட்ட நாடுகளும் அமெரிக்காவின் தாக்குதலுக்கு எதிர்ப்பு தெரிவித்துள்ளன.
இதற்கிடையே, வெனிசுலா எல்லைப் பகுதியில் தங்கள் நாட்டு ராணுவத்தை நிறுத்துவதாக அண்டை நாடான கொலம்பியா அறிவித்துள்ளது. அமெரிக்க தாக்குதலைத் தொடர்ந்து, வெனிசுலா மக்கள் அகதிகளாக கொலம்பியாவுக்குள் வர வாய்ப்பு இருப்பதாக அந்நாடு கருதுகிறது. இதற்கான முன்னேற்பாடுகளையும் கொலம்பியா மேற்கொண்டு வருகிறது. வெனிசுலா–கொலம்பியா நாடுகள் சுமார் 2,000 கிலோமீட்டர் நீள எல்லையை பகிர்ந்து கொள்கின்றன என்பது குறிப்பிடத்தக்கது.
மதுரோவிடம் விசாரணை
அமெரிக்க படைகளால் கைது செய்யப்பட்டுள்ள வெனிசுலா அதிபர் மதுரோ, 2020ஆம் ஆண்டில் நியூயார்க்கில் பதிவு செய்யப்பட்ட போதைப்பொருள் பயங்கரவாதம் தொடர்பான வழக்கில் விசாரிக்கப்படுவார் என தகவல்கள் வெளியாகியுள்ளன.
அதிகாரத்தில் யார்?
அதிபர் நாட்டை விட்டு வெளியேற்றப்பட்ட நிலையில், வெனிசுலா தற்போது யார் கட்டுப்பாட்டில் உள்ளது, ராணுவத்துக்கு உத்தரவிடுவது யார் என்பது குறித்து குழப்பமான சூழல் நிலவி வருகிறது.
உன்னிப்பாக கவனிக்கும் ஐரோப்பிய நாடுகள்
ரஷ்ய வெளியுறவு அமைச்சகம் வெளியிட்ட மற்றொரு அறிக்கையில், “வெனிசுலா அதிபரும் அவரது மனைவியும் அமெரிக்க நடவடிக்கையால் வலுக்கட்டாயமாக வெளியேற்றப்பட்டதாக வரும் தகவல்கள் மிகுந்த கவலை அளிக்கின்றன. இது குறித்து அமெரிக்கா உடனடியாக விளக்கம் அளிக்க வேண்டும்,” என தெரிவித்துள்ளது.
ஐரோப்பிய ஒன்றியத்தின் வெளியுறவுக் கொள்கை பிரிவு தலைவர் காஜா கல்லாஸ், “மதுரோ அதிபராக தொடர உரிமை இல்லை. சர்வதேச சட்டங்களும், ஐநா விதிகளும் மதிக்கப்பட வேண்டும்,” என கூறியுள்ளார்.
பெல்ஜியம் வெளியுறவு அமைச்சர் மேக்சிமே பிரீவோட், “ஐரோப்பிய நாடுகளுடன் இணைந்து தற்போதைய சூழலை உன்னிப்பாக கவனித்து வருகிறோம்,” என்று தெரிவித்துள்ளார். இதேபோல், அமெரிக்காவின் நடவடிக்கையை ரஷ்யாவின் கூட்டாளி நாடான **பெலாரஸ்**வும் கண்டித்துள்ளது.
