தமிழக பாஜ தலைவர் நயினார் நாகேந்திரன், திமுக அரசை கடுமையாக விமர்சித்து அறிக்கை வெளியிட்டுள்ளார். அதில், கொள்ளையடிப்பவர்களிடம் அதிகாரம் ஒப்படைத்ததே தமிழகத்தின் மிகப்பெரிய வரலாற்றுப் பிழை என அவர் குற்றம்சாட்டியுள்ளார்.
திருவள்ளூர் மாவட்டத்தில் அரசுப் பள்ளியின் கைப்பிடிச் சுவர் இடிந்து விழுந்ததில் 7-ஆம் வகுப்பு மாணவன் உயிரிழந்த சம்பவத்தின் துயரம் இன்னும் நீங்காத நிலையில், கோவை மாவட்டத்தில் உள்ள 100 அரசுப் பள்ளிகளின் சுற்றுச்சுவர்கள் முற்றிலும் சிதிலமடைந்து எப்போது வேண்டுமானாலும் இடிந்து விழும் அபாயத்தில் இருப்பதாக வெளியான செய்தி அதிர்ச்சியை ஏற்படுத்தியுள்ளதாக அவர் தெரிவித்துள்ளார். கோடிக்கணக்கில் செலவு செய்து விளம்பர விழாக்களை நடத்தும் திமுக அரசுக்கு, மாணவர்களின் பாதுகாப்பை உறுதி செய்ய மனமில்லை என்பதற்கான இன்னொரு சான்றாக இதைக் குறிப்பிட்டுள்ளார்.
எளிய குடும்பங்களைச் சேர்ந்த மாணவர்களின் பாதுகாப்புக் கூடங்களாக விளங்க வேண்டிய அரசுப் பள்ளிகளை அரசு இவ்வளவு அலட்சியமாக கையாள்வது புரியாத ஒன்றாக இருப்பதாக அவர் கூறியுள்ளார். குடிநீர் வசதி இல்லாததால் மாணவர்கள் ஊற்று தோண்டி தண்ணீர் குடிக்கும் நிலை, கழிவறை வசதி இல்லாததால் திறந்தவெளிகளை நாட வேண்டிய அவலம், சத்துணவில் புழு, பூச்சி, பல்லிகள் கலந்திருக்கும் சம்பவங்கள், புதிய கட்டடங்களின் மேற்கூரைகள் இடிந்து விழுவது போன்ற நிகழ்வுகள் தொடர்ந்து நடந்து வருவதாகவும் அவர் சுட்டிக்காட்டியுள்ளார்.
இந்த நிலையைப் பார்த்து பொதுமக்களின் நெஞ்சம் பதறினாலும், ஆட்சியில் இருப்பவர்கள் அமைதியாக வேடிக்கை பார்த்துக் கொண்டிருக்கிறார்கள் என நயினார் நாகேந்திரன் குற்றம்சாட்டியுள்ளார். அரசுப் பள்ளிகள் தனது கோட்டை என பேசிய பள்ளிக் கல்வித்துறை அமைச்சர் அமைதியாக இருந்து வருவதாகவும், “நான் உங்கள் அப்பா” என கூறிய முதல்வர் விளம்பர போட்டோஷூட்களில் பிஸியாக இருப்பதாகவும் அவர் விமர்சித்துள்ளார்.
இந்த ஆட்சியை நம்பி வாக்களித்த மக்கள் இன்று குடும்பத்துடன் ஆதரவற்ற நிலையில் நிற்கிறார்கள் என்றும், மக்கள் நலனைப் பாதுகாப்பதற்காகவா திமுக ஆட்சி பொறுப்பேற்றது என்ற கேள்வியும் எழுப்பியுள்ளார். இறுதியாக, கொள்ளையடிப்பவர்களிடம் அதிகாரத்தை ஒப்படைத்ததே தமிழகத்தின் மிகப்பெரிய வரலாற்றுத் தவறு என அவர் தனது அறிக்கையில் கூறியுள்ளார்.
