புதுடெல்லி / சென்னை:
திருப்பரங்குன்றம் மலையை மத்திய தொல்லியல் துறை கட்டுப்பாட்டில் கொண்டு வரவும், மலையிலுள்ள தீபத் தூணில் அணையா தீபத்தை ஏற்றவும் கோரிய ரிட் மனுவுக்கு பதில் அளிக்க மத்திய அரசுக்கும் தமிழ்நாடு அரசுக்கும் உச்ச நீதிமன்றம் உத்தரவிட்டுள்ளது.
மதுரையை சேர்ந்த ஹிந்து தர்ம பரிஷத் அமைப்பின் நிர்வாக இயக்குநர் கே.கே. ரமேஷ் சார்பில், வழக்கறிஞர் நரேந்திர குமார் வர்மா உச்ச நீதிமன்றத்தில் தாக்கல் செய்த ரிட் மனுவில், திருப்பரங்குன்றம் மலையின் வரலாற்றுப் பின்னணி மற்றும் தீப வழக்கத்தின் தொன்மை குறித்து குறிப்பிடப்பட்டுள்ளது.
பண்டைய மரபாகக் கருதப்படும் தீப வழக்கம்
கார்த்திகை மாதத்தில் சிவன், திருமால், பிரம்மா ஆகியோர் அக்னி வடிவில் அருள்புரிவதை விளக்கும் வகையில், 6-ம் நூற்றாண்டில் பாண்டிய மன்னர்களால் கட்டப்பட்ட முருகன் கோயில் அமைந்துள்ள திருப்பரங்குன்றம் மலையில் தீபம் ஏற்றுவது பண்டைய தமிழ் பண்பாட்டின் ஒரு பகுதியாக இருந்து வருகிறது. இந்த வழக்கம் சங்க இலக்கியங்களிலும் குறிப்பிடப்பட்டுள்ளதாக மனுவில் தெரிவிக்கப்பட்டுள்ளது.
போர்கால தடையும், தற்போதைய நடைமுறையும்
இரண்டாம் உலகப் போரின்போது பாதுகாப்பு காரணங்களுக்காக தீபம் ஏற்றுவது தடை செய்யப்பட்டது. அதன் பின்னர், கடந்த நூற்றாண்டு காலமாக உச்சிப் பிள்ளையார் கோயில் தீப மண்டபத்திற்கு எதிரே தீபம் ஏற்றப்பட்டு வருகிறது. இருப்பினும், மலையிலுள்ள பாரம்பரிய தீபத் தூணிலேயே தீபம் ஏற்ற வேண்டும் என்ற கோரிக்கையை பக்தர்கள் தொடர்ந்து முன்வைத்து வருகின்றனர்.
பிற கோயில்களில் நடைமுறையில் உள்ள அணையா விளக்குகள்
தமிழ்நாட்டில் தஞ்சை பெரிய கோயில், மதுரை மீனாட்சி அம்மன் கோயில், திருச்செந்தூர் சுப்ரமணிய சுவாமி கோயில், திருவாரூர் தியாகராஜா கோயில், திருவேற்காடு தேவி கருமாரியம்மன் கோயில் உள்ளிட்ட பல திருத்தலங்களில் படிவிளக்குகள் உள்ளதாக மனுவில் சுட்டிக்காட்டப்பட்டுள்ளது. இதேபோல், கேரளத்தின் லட்டுமனூர் மகாதேவா கோயிலில் கடந்த 450 ஆண்டுகளாக அணையா விளக்கு எரிந்து வருவதாகவும் குறிப்பிடப்பட்டுள்ளது.
நீதிமன்ற தீர்ப்பு மற்றும் தூர விவரம்
திருப்பரங்குன்றம் மலையில் தீபம் ஏற்றுவது தொடர்பாக முன்பு வழங்கப்பட்ட தீர்ப்பில், மலையிலுள்ள தர்காவின் சுற்றுச்சுவரிலிருந்து 15 மீட்டர் அப்பால் எங்கு வேண்டுமானாலும் தீபம் ஏற்றலாம் என உச்ச நீதிமன்றம் தெரிவித்துள்ளது. வழக்கமாக தீபம் ஏற்றப்படும் தூண் தர்காவிலிருந்து சுமார் 100 மீட்டர் தூரத்தில் இருப்பதாக மனுவில் கூறப்பட்டுள்ளது.
ஆகம விதிகள் மற்றும் அரசின் நிலைப்பாடு
தமிழ்நாடு இந்து அறநிலையத் துறை விரும்பியிருந்தால் தீபத் தூணிலேயே தீபம் ஏற்றியிருக்க முடியும் என்றும், முஸ்லிம்களை திருப்திப்படுத்தும் நோக்கில் உச்சிப் பிள்ளையார் கோயில் அருகே தீபம் ஏற்றப்பட்டதாகவும் மனுவில் குற்றச்சாட்டு முன்வைக்கப்பட்டுள்ளது. தற்போது தீபம் ஏற்றப்படும் இடம் இறந்தவர்களுக்கான மோட்ச தீபம் ஏற்றப்படும் இடமாக இருப்பதால், அது ஆகம விதிகளுக்கு முரணானது என்றும் தெரிவிக்கப்பட்டுள்ளது.
உயர் நீதிமன்ற உத்தரவும் அமலாக்கம் தொடர்பான குற்றச்சாட்டும்
திருப்பரங்குன்றம் மலையில் தீபத் தூணிலேயே தீபம் ஏற்ற சென்னை உயர் நீதிமன்ற மதுரை அமர்வு வழங்கிய உத்தரவை தமிழ்நாடு அரசு இதுவரை அமல்படுத்தவில்லை எனவும் மனுவில் குறிப்பிடப்பட்டுள்ளது. இதன் அடிப்படையில், திருப்பரங்குன்றம் மலையில் உள்ள சுப்ரமணிய சுவாமி கோயிலை மத்திய தொல்லியல் துறை கட்டுப்பாட்டில் எடுக்கவும், தீபத் தூணில் அணையா தீபத்தை ஏற்றவும் உத்தரவிட வேண்டும் என கோரப்பட்டுள்ளது.
மேலும், ஆண்டுதோறும் கார்த்திகை மாதத்தில் கார்த்திகை நாளன்று திருப்பரங்குன்றம் மலை முழுவதையும் விளக்குகளால் அலங்கரித்து, முருக பக்தர்கள் வழிபாடு செய்ய அனுமதி வழங்க வேண்டும் என்றும் மனுவில் வலியுறுத்தப்பட்டுள்ளது.
நேற்றைய விசாரணை விவரங்கள்
இந்த ரிட் மனுவை உச்ச நீதிமன்ற நீதிபதிகள் அர்விந்த் குமார், விபுல் எம். பஞ்சோலி ஆகியோர் அடங்கிய அமர்வு நேற்று விசாரித்தது. மனுதாரர் தரப்பில் வழக்கறிஞர் சி.ஆர். ஜெயசுகின் ஆஜராகி, மனுதாரர் எந்த மதத்துக்கும் எதிரானவர் அல்ல என வாதிட்டார்.
உயர் நீதிமன்றத்தில் இந்த விவகாரம் நிலுவையில் உள்ளதா என நீதிபதிகள் கேள்வி எழுப்பினர். இதற்கு பதிலளித்த வழக்கறிஞர் ஜு. பாலாஜி, திருப்பரங்குன்றம் தீபத் தூணில் தீபத் திருவிழாவின்போது தீபம் ஏற்ற வேண்டும் என்ற தனி நீதிபதி உத்தரவை சென்னை உயர் நீதிமன்ற இரு நீதிபதிகள் அமர்வு கடந்த 6-ம் தேதி உறுதி செய்துள்ளதாக தெரிவித்தார். அந்த தீர்ப்புக்கு எதிராக தமிழ்நாடு அரசு மேல்முறையீடு செய்ய பரிசீலித்து வருவதாகவும் கூறினார்.
இருதரப்பு வாதங்களையும் பதிவு செய்த நீதிபதிகள், திருப்பரங்குன்றம் மலையை தொல்லியல் துறை கட்டுப்பாட்டில் எடுத்து, தீபத் தூணில் அணையா தீபத்தை ஏற்றக் கோரும் ரிட் மனுவுக்கு நான்கு வாரங்களுக்குள் பதில் அளிக்க மத்திய அரசுக்கும், தமிழ்நாடு அரசுக்கும் உத்தரவிட்டனர்.
